18
Dek kami, pandang jawuah alah balayangkan, pandang dakek alah batukiekan. Lah elok susun nan bak sirieh, makan alah tibo dinan kanyang, minum alah tibo dinan sajuak. Tapi ko ado juo sak jo wasangko kito pulangkan sajo kapado nan kuaso.
"JAWABNYO"
Dek kami nan manjadi rusuah dengan gamang iyo muluik Datuak nan sapatah itu. Baa nan sakarang kini nangko dek nan ditunggu alah tibo. Lai sigaji alek kami lapeh jo hati nan suci jo muko nan janiah. Alek: Lah kajadi kami barenjeang tagak. Hal ini bisanya dijawab oleh sipangkalan dengan ucapan "JADI"!
"PIDATO SIRIEH"
Assalamualaikum Wr. wbr.
Jo salam sambah dianjuang, kahadapan angku jo Panghulu nan gadang basa batuah. Bukan bahinggo jo babate indak basibakjo basisie, Cadiek tahu pandai, Bilal, Ulama, Khatib sarato nan hadok adang.
Sombah manyombah dipulangkah pado Allah, titah tatabuah kanan rapek, salam kapado nan basamo.Talatak puntiang diulu, dibawa kiliran taji. Asa rundiang nan daulu, tigo limbago nan tarajoli. Partamo sambah manyambah, kaduo sirieh jo pinang katigo baso jo basi.
Sambah manyambah di dalam adat, tali batali undang undang, Tasabuik dimuluik mani tapakai dibaso bayiek. Muluik mani calempong kato, baso bayiek gulo di bibie dalam cupak nan piawai banamo adat sopan santun.
Adat di Lawik bajurumudi, adat disabuang bajuaro, adat di alek bajuru janang. Kok dikaji tantang si juru mudi, tahu di ombak nan basabuang, tahu di angin nan basiru, jaleh bana dipasang turun nayiak. Kok dibilang si juaro, tahu di tuah sisiek ayam jaleh dibulang nan bakicuah, pandai managah manapin taruah.
Nan tasabuik si Rajo janang, tahu di hereang dengan gendenang, tahu dicaka dengan kaik, pandai manjago labieh jo kurang. Manuruik cupak jo gantang, dek banyak ragu kok tibo dek lamo lupo kok datang, agak kok kurang juaronyo.
