21
Ampun sayo di sidang Rajo Rajo, Basa -Basa, Rangkayo Rangkayo arato nan GAdang Basar Batuah sa Alam nangko.
Nan datang bahimpun ka Medan nan Bapaneh tando alamaik basuko hati, kulansiang adat nan bamuliakan.
Salam jo ma-af sayo mohonkan kapado sangko Bundo kanduang limpapeh rumah nan gadang, ambun puro aluang bunian, cahayo rumah salendang dunie, suniarak Koto jo Nagari.
Sairiang balam jo barabah
balam mandi barabah lalu
saikua mati tagalampai.
Sairiang salam jo sambah
sambah lalu salam kumbali
pituah tingga dinan tuo
pidato pulang kanan pandai.
Dilapeh kulansiang adat, etan ka Luak jo karanah lalu ka Pasisie jo karantau , hinggo Sikilang Ayie Bangi, salingka gunuang Pasaman , salare Batang Batahansampai ka Sasak jo Kinali.
Ka Sontang jo Padang Tujuah, nan di Pituan Parik Batu , ka Rokan jo Pandalian ka Kampar Lipek kain , ka Kuntu gunuang Sailan rantau nan kurang aso duopuluah.
Lalu ka Pucuak Jambi Sambilan Lurah , tarui ka Pahang Singapura.Sangie Lembah Gumanti Alam Surambi Sungai pagu, cukuik jo Banda Nan Sapuluah, lalu ka Tapan Indopuro.....
Bayiek ka Kubuang Tigo bale, Sijunjuang jo Koto Tujuah, Koto Sambilan Nan di Hilie, Koto Sambilan nan di Mudiak sampai ka Jambak Jambulipo, ka Sitiuang jo Koto Baru ka Siguntuo Sungai Lansek.
Bagindo Rajo, Rajo Barangan, laka sikabau nan tongga camin tarui Pulau Pujuang, ka Kamang Mudiak Magek Sulayo, Gaduik Tilatang, Kurai jo Banuampu, Sianok jo Koto Gadang, Guguak Tabek Surajo, Matuo LawangTigobalai sampai ka Ranah Palembayan, lalu ka Maninjau Sungaibatang, manggopoh Sungai Garinggiang, Lubuak Basuang jo Batukambiang, sampai ka Tiku Pariaman laluka Toboh Pakandangan.
Ka Sintuak ka Lubuak Aluang, Sungai Sariak Nan Sabari, ikuo darek kapalo rantau, Kayutanam tasabuiknamo. Kuraitaji jo Pawuohkamba tanamo pulo Sultan Sailan di Tujuah Koto, Limaupuruik jo Kampuang Dalam sampai ka Malai Nan Tigo Koto.
