– 29 –
Bapakai sambah manyambah, sambah manyambah di dalam adat, tali
batali undang undang. Tasabuik bamuluik mani takato di baso bayiek. Muluik mani calempong kato, baso bayiek gulo di bibie.
Palupuah batang malapari, pucuak sitawa aka capai batang limpato rang patahkan sungguahpun ambo tagak badiri. Bukan tando rang cadiak pandai, pusako kato nan ambo pasambahkan. Nayiak ka gunuang banyak kabuik lalu ka rimbo ulu jati, kayu gadang banyak bagatah nan bacampua jo kayu kamaik.
Takuik gumanta ambo manyambuik, dek Panghulu banyak nan sati rang gadang banyak nan batuah, tuangku banyak nan kiramaik, Mangko mamintak ampunlah ambo dek Panghulu nan gadang basa batuah. Ambo nan mambilang nan manyambah, nan maurai mamapahkan. Condong nan rabah lai batungkek, pucuak sitawa disusunkan. Tolonglah ambo dinan rapek nan maa nan gawa jo nan tingga diampunkan
Disawah nan bakiambang
banyak padi nan tak mangasi
Kok gawa bulieh ditimbang
pado badoso ampun pa-awali
Garak nan turun dari pado Allah, Khalifah nan turan dari pado Nabi,
pusako nan dari urang tuo, syarak nan dari pado guru. Turun dari Langik awang gumewang Lalu Jibrail manyampaikan. Itulah mangko
dikatokan Tuanku dalam Nagari. Suluah nan tarang, Palito nan indak
padam dari awa sampai akhie sampai hari yang kamudian.
Partamo Allah kaduo dunie, katigo pintu sangketo, ka ampek pinto
Narako, kalimo hari wakatu, ka anam ayie sumbayang, katujuah budak dikanduang, kasalapan Muhammad nan jadi patang Sanayang 12
Rabiuawal.
Mangko dikaranglah Tafasie jo Fiki di dalam Nagari Makah jo Madina. Itulah nan dibawo ninek kito, etan kabatu nan barayun, ka ayie nan barulak mudiak. Mulonyo adat kadipakai dengan papatah jo patitiah. Asanyo Rajo nan daulu Iskandar Zulkarnain anak Zis ’Alaihis
salam nan kurang aso ampek puluah.
Partamo Sutan Maharajo Alif kaduo Sultan Maharajo Dipang nan katigo Sultan Mahanyo Dirajo. Sultan Maharajo Alif di Banua Ruhum, Maharajo Dipang di Banua Cino Maharajo Dirajo ka Pulau Paco nangko.
