"Mano Mamak nan di siko-apo garan dimukasuik-indak kok buek pabuatan. Salaruik salamo nangko-balun tajadi rabuik-rampeh-balun tapakiak jo tapukau-iyo di jalan rami nangko. Kini tajadi hiru-biru-urang lalu igau-igauan-atau koh iko disangajo-mahunyi kubu bateh nangko-elok kato-kan jaleh-jaleh!"
Mahariak Palimo Nan Pilihan-mambulalak ka Ambuang Baro-inyo nan alun panah tahu-bahaso itu nan Ambuang Baro-lalu bakato jo congkaknyo,
"Mano Buyuang nan gadang kecek-manga Buyuang sampai ka mari. Indakkoh Buyuang danga-danga-labuah nangko jalan talarang-indak buliah ditampuah urang-bila lalu bila mati-katik lalu katik mati. Mangko dihunyi bateh nangko-basabab mulo kajadi.
Indakkoh waang danga-danga Sutan Rajo Talauik Api-manti di Canduang Koto Laweh-urang nan gadang kami lambuak-urang nan tumbuah kami siang-tingginyo kami nan maanjuang. Suruahnyo wajib kami turuik-parentahnyo patuik kami junjuang.Nan sakarang kini nangko-tunangannyo diambiak urang-indak bapasan babarito, Laku parangai Datuak Bungsu-bapak si Buyuang Ambuang Bato janji baikek lah bakarang-tando batuka timba-baliak lah ditakuak bakato kabaralek-kini baurak ungkai sajo.
"Nan tapakai manuruik Adaik-jokok bakandak gantiang putuh jalanglah niniak-mamak kami-isi cupak sapanuah-nyo bao ameh sakaco urai-tando rundiangan diputuihi-sia malalah sia patah baitu, Adaik nan bapakai. Dek ulah
lakunya Ambuang Baro-mambari malu bakeh kami-arang tacoreng pado kaniang - mangko tajadi nan bak nangko! Indak koh waang tahu iko Palimo nan Pilihan-urang manampuah rusuak jalan-indaknyo mamang di nan tajam-bapantang suruik tangah jalan! Tantang kawan denai nangko-sorang panggawa urang panggao-urang baulam basi matah-indaknyo talok dibantuak-indaknyo maimbang lawan. Lai tadanga itu dek ang?"
96
