↓Laman ko alah sah
B A B IV
Baraliah kaba tantang itu-sungguah baraliah sinan juo-baraliah bakeh Puti Intan-namun di patang hari nantun kiro-kiro pukua ampek-sadang duduak ateh tandaian-batanun kain ken- dang-kendang-kadang-kadang inyo bamanuang-di bawah lumbuang padinyo-turun biainyo dari rumah-malihek anak batanun.Lamo sabanta antaronyo-baranti inyo batanun lalu mamandang ka biainyo-mato sayu pamandangan lunak-mukonyo pucek kali-hekan-sanan bakato Puti Intan,
- "Biai kanduang di badan hambo-hambo bamimpi malam tadi-rasonyo mimpi buruak bana-antah apo nan katasuo.Hambo duduak sadang batanun-ditandaian iko juo tibolah angin halimbubu-badantuang cando patuih tungga-balenggang-lenggang tiang panjang-taranjak sandi rumah gadang-habih tabacuik gonjong atok. Turun galodo dari gunuang-gadanglah aia ampuah padang-tarangkek batu di tapian-hanyuik hambo samo jo tanun-Untuang taawai aka bamban di sinan hambo bagayuik-tanun anyuik tandaian karam-tagaruang tasintak tidua-ayam bakukuak hari siang-sampai kini tagamang juo-apokoh garan taawinyo."
Tamanuang biainyo mandangakan-darah tasirok-sirok pulo-lalu manjawab inyo sanan,
- "Indaklah apo tu nak kanduang--rasian pamenan lalok-ka cimpuang pamenan mandi-biaso juo nan baitu-rehan kalua pai hamain-manampuah mego langik tinggi-usahlah cameh bana!"
Lah sudah tanyo dijawab-naiak inyo ka ateh rumah-lalu taruih masuak ka dapua - pariuak sadang tajarang-nan Gondanlah tingga surang sadang bamanuang-manuang juo-hatinyo samak-samak ragu iyo bak pantun si Pangarang,
104
