"Sakali suri di lantak,
lah kusuik banang saluru,
sabab indak karano indak
hati jadi bakaru ragu.
Sakali karok dihantak,
putuih sahalai banang kain,.
baa kolah maulehkannyo;
hujan indak paneh pun indak,
badan bak raso palak dingin,
antah kok rusia nan mambao.
Sakali suri dilantak,
lah putuih banang dikarok;
janji indak bapasan indak,
darah jadi badabok-dabok."
Kununlah maso leh nantun-indak nian disangko-sangko-maraok saikua alang hitam-hinggok tagak ateh tandaian-gadang nan bukan alang-alang. Tagamang malah Puti Intan-malihek rupo alang nantun-lalu dikajuiki alang nantun sambia manyumpah inyo bakato,
- "Alang sarau alang cilako-tanun awak sadang tarantang-inyo nan datang mangusuikan."
Lorong kapado buruang nantun-sato digaro inyo malayok-lah hinggok ka ateh tangga-tagak mamandang ka Puti Intan. Gondan mamandang ka alang nantun-malihek bana nyato-nyato-hitamnyo indak babacak-bakilek-kilek cahayonyo-ditimpo cayo paneh datang patang. Indak diaso disangajo dek nan Gondan Puti Intan-tabayang di ruang mato-marupo dalam pamandangan batang tubuah Kakak kanduangnyo iyo nan Gombang Ambuang Baro. Dalam inyo tacangang juo-malayok pulo alang nantun ka ateh banang nan tarantang. Takajuik sangaik Puti Intan malihek laku nan bak kian-dilempakan turak di tangan-iyo ka batang tubuah alang-jatuah sahalai bulu sayok. Bakotat alang kasaki-kan-tabang hinggok ka ateh atok-kudian babega di udaro tabang
mambubuang inyo kini-hilang nan dari pamandangan.
105
