↓Laman ko alah sah
Lorong nan Gondan Puti Intan-sahilang alang dari mato-rusuah tibo dalam hati-indak tantu nan dirisaukan. Ado sasa aik kalamonyo-mahimbau urang di balakang-kironyo Aciak Jilatang Kampuang-sambia tagak inyo bakato,
- "Anak den Upiak Puti Intan-manga Upiak rintang batanun-digilo suri jo karok-alunkoh Upiak dapek kaba?"
Tambah tagamang Puti Intan-mandanga kato Jilatang Kampuang-batanyo baguluik-guluik,
- "Biai den Aciak Cipeh-baa baitu kato Biai-barito apo Biai bao-sugiro malah katokan-nak tanang darah di dado!"
Bakato malah Aciak Cipeh-inyo barundiang lunak-punak,
- "Mano nak kanduang Puti Intan-kok anak alun mandanga-bialah denai manyampaikan-dangakan malah tanang-tanang. Pai ka Canduang denai cako-babaliak denai dari sanan-lalu ka kubu Katanahan-takajuik denai tasirok darah-guyah sagalo pasandian-mancaliak apo nan tajadi-iyo di kubu Katanahan. Nan Gombang Bujang Ambuang Baro-sadang bacakak bakalahi-jo rang Canduang Koto Laweh-jo Palimo nan Pilihan baduo urang kawannyo-denai mancaliak dari jauah. Lah lamo garan bacakak-lah lacuik-malacuikan-baganti hampeh-mahampehan-surang pun indak balukoan. Suratan tangan nan bakato -tajatuh Bujang Ambuang Baro-dihimpik Palimo nan Pilihan dikabek kaki jo tangannyo-badan jatuah sakin pun lakek-darah manyambua dilihanyo-bacarai badan jo kapalo. Mato den bana nan malihek- Gombang jatual detanyo tabang-deta manjadi alang hitam balega-bega di udaro heran denai mamandangi.
- Sadang kapalo Ambuang Baro-dibungkuih lalu dibaonyo-dek Palimo Nan Pilihan iten ka Canduang Koto Laweh.Nak kanduang Upiak Puti Intan-pa saba sajo hati anak-jan hati dipaturikan denai nak pailah dahulu."
Tagaruang sanan Puti Intan-alah manampa-nampa dado-mahelo-helokan rambuik-marantak-rantak ditandaian-manangih
106
