Lah pueh inyo maratok-lah panek mancari-cari-harilah sirek rambang sanjo-basintak pulang hanyo lai-sarato kawannyo nan baduo. Lorong nan Gondan Puti Intan-manantang arah ka Canduang-sambia tagak bacakak pinggang-naiklah darah baraninyo-bangkik sanan buransangnyo -sambia manunjuak inyo basaru-iyo bak pantun si Pangarang, Lua error in Modul:Ppoem at line 175: bad argument #1 to 'inNamespace' (unrecognized namespace number '104'). Lalulah pulang anyo lai-bajalan tadoai-doai-harilah barabuik sanjo pulo. Lah sampai di ateh rumah-sadang dama alah basalai-sudah sambayang urang naiak-panuahlah rumah gadang nantun-tandonyo samo kerusuahan-basidakah doa jo kaji-kok lai inyo badoso-iyo mandiang Ambuang Baro.
Olah alainyo bungo alai-lah sudah urang mangaji-hari batambah laruik juo-bamohon pulang urang nan banyak. Namun samalam-malam nantun-sakalok haram namuah lalok-iyo Aciak Silaro Aceh-baitu juo Datuak Bungsu, sarato urang nan lain. Pihak nan Gondan Puti Intan-tidua bagaluang dibiliaknyo-sakalok haram kok leh lalok-hati pacah pikiran kacau-rupo kakak tabayang-bayang-tagamba-gamba pacakakan-baralah kapayah badan-awak surang inyo batigo--setan ibilih marupokan-kakaknyo lah latiah payah-lawannyo mahantam juo-indak buliah mamintak ampun. Tabayang pisau nan tajam-mamutuih lihia nan buleh-darahnyo manyambua-manyambua-tubuah takapai tingga surang.
Dapek pikiran sakutiko-nak pai manuntuik baleh-iyo ka Canduang Koto Laweh-hutang nyao baia jo nyao-baitu tekaik di hatinyo.
Habih hari baganti hari-cukuik bilangan tujuah hari-iten di Canduang Koto Laweh-di rumah Balunan Suto-urang sadang barami-rami-gilo mamasak jo manggulai-laki-laki jo parampuan-samo-samo rintang dibueknyo. Mangkonyo sababnyo damikian-di
112
