sinan urang kabaralek-kamaadokan jamu basa-mamanggia urang nagari,
Sutan Rajo Talauik Api-lah banasa dalam hatinyo-karano inyo alah manang-baparang tandiang caro adaik-jo rang nagari Balaigurah-lah mambunuah Ambuang Baro-alah baubek raso hati-malu alah tatuntuik-piutang alah manario. Duo ikua mambantai kabau-panjamu Basa jo Panghulu-manyatokan alek kamanangan-tandonyo inyo urang Basa-urang kayo di kampuangnyo. Itulah sababnyo, rami bana-di rumah Suri Balunan Suto-urang rintang basiap-siap-barisuak alek ka karumah.
Dalam urang karajo nantun-indak diaso disangajo-lalu kasinan surang-urang-manjujuang katidiang sadah-roman kurang pakaian kurang-tapi alun tuo bana. Mancaliak urang rami-rami- singgah malengong urang nantun ka dapua tampek mamasak Dek Suri Balunan Suto-manyapo inyo sakali.
- "Oi Kakak urang nan lalu-kapai kama kini nangko- datang dima garan cako-harilah sirek rembang patang-apokoh ga-an di katidiang?
- Sanan manjawab urang nantun,
- "Mano Kakak urang di siko-denai nan datang dari jauah-dari Bayua danau Maninjau. Sajak pagi denai bajalan lah banyak kampuang nan tatampuah-kamalaman tibo di siko, Kok buliah pintak jo pinto-manompang haa samalam ko bisuak pagi denai nak pai-kok untuang dapek rasaki-sahabih sadah sakatidiang-lai dapek nan dimukasuik."
Manjawab Suri Balunan Suto-dek mandanga pintak urang nantun-dilihek lai urang elok-bakato inyo sakali.
- "Oi Kakak panjua sadah-kok ah baitu kato Kakak kabaa pulo kato kami-di siko malah samalamko. Naiak lah Kakak ka ateh rumah-baranti payahlah dahulu. Tapi kok lai indak panek bana-kok jai suko manolong gadang raso hati kami.. baban barek pitolong datang!"
Sanan manjawab urang nantun manjawab sambia galak sanyum,
113
