Pihak nan Gondan Puti Intan-di hari-sahari nantun-tidua bagaluang di biliaknyo-indak inyo kalua-lua-latiah badan bukan kapalang-badan lamah tulang pun lunak-hati di dalam manggarito.
Tantangan rundiangan ka Biaro-jo Pamuncak Sutan Maka-sabalun tajadi pacakakan-alah diangsua Ambuang Baro-alah sasuai parundiangan-jo niniak-mamak nan di sinan-kini tahanok haniang sajo-sabab dek bala basa nantun-talatak indak batampek-tagantuang indak batali-indak tantu duduak tagaknyo.
Habih hari baganti hari-habih pakan baganti bulan-sampailah garan tigo bulan-ado kapado suatu hari-hari nan sadang tangah hari tasuak-suak juo di dalam hati-uliah nan Gondan Puti Intan-kakaknyo mati dibunuah-indaklah mati sampai aja. Lah jadi ta-kaik di hatinyo-utang nyao baia jo nyao- utang ameh baia jo ameh-dek Talauik Api manyuruah bunuah-patuik inyo dibu- nuah pulo-baitu di hati Puti Intan. Di jalang malah Biai kanduang-sarato Bapak kanduangnyo-lalu bakato maso itu,
- "Mano Biai manolah Bapak-jokok dipikia dimanuangkanlah malang bana untuang hambo-ibaraik ladang indak bapaga-taranak lalu lalang sajo. Kini baitu malah Bapak-nan
taraso nak hambo sabuik-lah mati Tuan Ambuang Baro-anak Bapak nan laki-laki-tingga hambo tungga babeleng-nan laki-laki hambo juo-padusi iyo hambo juo. Indak nan lain nan diharok-pamikua barang nan barek-panjapuik barang nan jauah-pahapuih malu dikaniang. Kini nan pintak pinto hambo-ijin jo rilah dari Bapak-sarto Biai kanduang hambo-hambo nak pai kini nangko-manuntuik baleh kakak hambo-ka Sutan Rajo Talauik Api-utang nyao baia jo nyao-nak tahapuih malu kito. Usah di hembek langkah hambo-langkah hambo lai kalalu-baitu dalam pamandang-an!"
Tamanuang baliau Datuak Bungsu-tagamang Silaro Aceh-mandanga putusan Puti Intan. Dicubo bana mahambek-bak raso indak katahambek-dek kareh hati Puti Intan-Bacakak hati jo jantuang-mancari baa nan kaelok-dilapeh indak dilapeh-namun inyo kapai juo-sanan bakatolah bapaknyo,
117
