Tasanyum manih Puti Intan-mambayang gigi nan putiah-mamandang bakeh Sutan Rajo-pancaliakan sirauik jatuah-pandang mamutuih rangkai hati-lorong Rajo Talauik Api-hilang bana bakucak iman-sanan bakato hanyo lai,
- "Diak kanduang Gondan Puti Intan-manga Adiak sampai kamari-apokoh garan nan dicari-sia ko lah manyuruah Adiak?"
Manjawab inyo Puti Intan-jo kato-kato lamah lambuik-sarato sanyum manihnyo, "Tuan Sutan kato hambo-indaklah urang
- nan manyuruah-hanyo kahandak hati hambo. Rundiangan baiak hambo bao-usah di siko hambo sabuik malu awak didanga urang. Jokok Tuan lai suko-elok kito bajalan-jalan arah ka tangah sawah nantun-padi pun lai sadang kalam nak pueh kito barundiang-baa pandapek Tuan Sutan?"
Kununlah inyo Sutan Rajo-mandanga pintak Puti Intan-indak tabado sanang hati-dek cinto alah mangamuak-buruang jinak raso di tangan-indak rago dipikek-pikek-urang manyarahkan dirinyo-lalu bakato maso itu,
- "Adiak sayang Puti Intan-malah baitu nan katuju-manuruik sajo badan nangko-kama juo ka Adiak bao-hambo nan indak kamanupang!"
Sananglah hati Puti Intan-jo mudah sajo mamikeknyo-indak rago bapayah-payah. Lalu bajalan kaduonyo-manuju ka tangah sawah-bajalan ateh pamatang-padi di sawah alah manguniang. Lah jauah dari kampuang Canduang lalu duduak inyo barudiang-sanan bakato Puti Intan,
- "Tuan Sutan janyo hambo - lai di hambo nan takana-siang manjadi angan-angan-malam manjadi buah mimpi-indak hilang sakajap mato-dangakan juolah dek Tuan, Maso di hari nan dahulu-pihak kapado kito nangko-alah baikek alah batando-manuruik sapanjang adaik-mananti maso kasampainyo. Dek ragam dunia nangko juo-antah asuang antah pitanah-antah urang banci kakito-hinggo tajadi tikam-bunuahlah kusuik dalam nagari. Pihak di diri Tuan hambo-
119
