B A B V
Alah satahun dang lamonyo-sajak hilangyo Ambuang Baro-pihak baliau Datuak Bungsu-atau Aciak Silaro Aceh-sarato Datuak Rajo Sakampuang-hilang aka amaik bicaro-pangana banyak hilang-hilang pikiran acok tatumpu-sabuah indak nan takakok.
Tantang nan Gondan Puti Intan-sajak mambunuah Sutan Rajo-agak barubah dari dulu-darahnyo acok naiak-naiak hatinyo acok indak saba-kadang-kadang inyo pamberang kadang-kadang inyo panangih. Taingek malah di hatinyo-tahadok rundingan Ambuang Baro-samaso inyo alun mati-nan Intan alah di-patunangkan-dangan Pamuncak Sutan Maka-urang Biaro Piliang Gunuang-suami Rono Bungo Alai-anak kanduang dek Kayo Urai-urang Canduang Kapalo Koto. Baa sakarang kini nangko-rundingan nantun talatak sajo-talatak indak batampek-tagan tuang indak batali ibu-bapaknyo diam sajo-baitu pulo dek mamaknyo. Dek indak sanang di hatinyo-malu di kawan samo gadang-dibaranikan sajo malah hati-manamui Pamuncak Sutan Maka-indak satahu ibu-bapaknyo.
Adolah kapado suatu hari-manjalang pukua ampek patang-pai Gondan ka tapian-iyo tapian Sungai Lasuang-indak jauah dari rumahnyo-icak-icak manjapuik aia. Nan jadi niaik jo sangajo-nak mananti Pamuncak Sutan Maka-nan tatap lalu ka sanan-jalan ka rumah Bungo Alai. Dek untuang inyo kabatamu-lalu Pamuncak Sutan Maka-bajalan cando tagageh. Managua Gondan Puti Intan,
"Tuan Pamuncak Sutan Maka-baranti Tuan sabanta-hambo nak barang dikatokan!"
Takajuik Pamuncak Sutan Maka-mandanga suaro Puti Intan-lah tagak inyo sabanta-heran taraso dalam hati-mamandang laku Puti Intan-sabab alun panah biaso-lalu bakato maso itu,
123
