"Upiak Gondan Puti Intan—baa mangko jadi barani—baa parangai diubahi. Dahulu Adiak lai sopan—leh sopan pamalu pulo. Usah bak nangko dikajokan-salah cando dilihek urang!"
Lorong nan Gondan Puti Intan—agak mandakek inyo tagak- bakato sambia tasanyum
"Usah baitu kato Tuan—pihak di badan diri hambo—lai manaruah mulo-sopan,
Sangajo hambo mananti—gadang mukasuik dalam hati—santano lai urang mancaliak—indak raso kasalah bana—rundingan baiak hambo bao—sabalah Tuan agak sabanta!"
Manjawab Pamuncak Sutan Maka, "Manolah Gondan Puti Intan—takuik lah hambo tantang nantun--malu taraso dalam hati—hambo mudo Adiak pun mudo--baralah kamalu awak—kok lai urang manampak. Limbak nan daripado itu—Adiaklah samo tahu juo—kulikaik urang awak nangko—nan indak diadokannyo sajangka jadi saheto—elok Adiak babaliak pulang karano hambo nak baguluik!”
Dipujuak dirayu dek Puti Intan—kato manganduang pamintaan—mambao harapan di dalamnyo
"Tuan juo kato hambo—rundiang sapatah hambo sabuik—bak duri di dalam dagiang—bak tulang dalam rakuangan—dangakan malah dek Tuan! Samaso hiduik Tuan hambo—Tuan Rangkayo Ambuang Baro—ado inyo maninggakan kapado Tuan Sutan Maka—iyo sahalai cindai buruak—bagiolak ado kagunonyo—Tuanlah suko manarimo-lah hampia satahun pulo. Tapi kini hambo lihek-alah batuka mato angin hapaliang cando kamudi—sajak paningga kakak hambo
124
