bangkalai kok lambek disudahkan,
banang tarantang kok nyo lapuak.
Tuan Pamuncak Sutan Maka-mamintak hambo sungguah-sungguah:
Banang tarantang jan diluluih,
tinggakan sajo dalam turak;
barilah hambo kato putuih,
nak sanang hati ibu-bapak."
Kununlah Pamuncak Sutan Maka-mandanga kato Puti Intan-sarato suaro lamah-lambuik-taratik-sopan manarik hati-ta tawan juo kasudahannyo. Dek lah lamo bapandangan-hati lakek cinto pun tumbuah-manyala kaurek sarap-tak mungkin lai mailakan jadilah tunduak maso itu-lalu mambari kato putuih,
"Adiak kanduang Puti Intan-nan taraso alah hambo sabuik-walau bahayo nan katibo-Adiak nan indak namuah saba-kabaa pulo kato hambo. Hanyo saketek hambo sabuik,
Barisuak hari ka Silasa,
pakan Kamih di Suruaso;
kudian Adiak kok manyasa,
manompang malang nasib hambo.
Kalamkarih tumbuah dipasia,
sabatang tumbuah ateh atok;
habih-habih Adiak bapikia,
isuak jan jadi buah ratok.
Kini baitu hanyo lai-babaliak pulanglah dahulu-suruahlah mamak kanduang kito-maulang kato nan dahulu-batanun buliah dimuloi!"
Kununlah Gondan Puti Intan-indak tabado gadang hati-galak bagumam di bibianyo-caliak mamutuih rangkai hati -bakeh Pamuncak Sutan Maka- lalu bakato jo manjonyo,
"Tuan kanduang hubungan nyao-mandanga tutua kato Tuan -kok litak lah buliah nasi-kok auih lah dapek aia,
127
