manuruik sapanjang Adaik. Sasudah basauah tando-japuik manjapuik dilangsuangkan-manuruik Adaik nan bapakai-dalam nagari Balaigurah-atau di dalam Ampek Angkek.
Sapakan lamonyo basadio-patang Kamih malam Jumaaik-batamu rueh jo buku-langsuanglah alek pakawinan-lah jatuah ijab jo kabua-antaro Pamuncak Sutan Maka-dangan Gondan Puti Intan-anak daro jo marapulai-duduak basandiang ateh kasua-di bawah tirai langik-langik-diapik banta nan banyak-surang bulan surang matohari-pamenan mato kaduonyo.Sanang-lah hati ibu-bapak malihek anak jo minantu-baubek rusuah salamoko-lah lamak nasi dimakan-mangucap sukua pado Allah-naimaik Tuhan ateh dunia.
Birawari nan Gondan Puti Intan-jo Pamuncak Sutan Maka-namonyo urang mudo-mudo-lah lamo tando baikek-kinilah baru maso dibukak. Pajatian urang nan baduo-rintang bacanda jo bagurau-bunyi galak badarai-darai-bunyi pantun babuah-buah-indak sabuah dirusuahkan.
Alah sahari duo hari-lah sampai bilangan tujuah hari-alek abih lapiak bagulung-panggilanlah jimek datang. Sasudah makan tangah hari-sadang duduak baduo-baduo-iyo Pamuncak Sutan Maka-jo parampuannyo Puti Intan-tabik rundingan hari nantun-dek Pamuncak Sutan Maka-bakeh nan Gondan Puti Intan,
- "Adiak nan Gondan Puti Intan-ado sabuah nan taraso-hambo sampaikan kini nangko-dangakan malah baiak-baiak. Lah tujuah hari tujuah malam-hambo lah jadi urang siko-kok litak nasi talatak-kok auih aiak lah tibo-sadang dek Biai
kanduang kito. Pihak di kito nan baduo-lah kusuik pakaian sapatagak-lah lusuah lapiak nan sahalai-siriah lah kusuik dicarano. Kini sabuah pintak hambo--sadang ka diri Adiak kanduang Adiak lapeh hambo dahulu di malam-samalam nangko-bialah hambo indak siko. Adiak kanduang lah tahu juo-anak kito sadang tak sanang-anak si Rono Bungo Alai-niaik hambo nak maliheknyo-lapehlah hambo samalamko-lapehlah jo hati suci-sarato muko nan jaraniah-patang siang hambo siko!"
129
