- di Kubu Paniang-paniang-itulah dukun nan tasabuik-balaku apo nan dimintak-lah banyak urang nan mancubo-lai barakaik kasadonyo-baa pikiran Kayo Urai?"
Mandanga kato Aciak Cipeh-lalu bakato Kayo Urai,
- "Iyo kini baru takana-iyolah Datu Banyak Barang-urang nan banyak kapandaian-bialah kian denai pai-kok untuang mudah-mudahan batamu rueh jo buku-kok lai balaku pintak awak!"
Lalu asuangnyo Aciak Cipeh-tagalak inyo dalam hati-ditambahnyo pulo sapatah lai,
- "Kok iyo lai taniaik-eloklah disugirokan-kok lai balaku pintak awak-tatap sajo inyo jo awak-jarang ka rumah Puti Intan!"
- Lalu manjawab Kayo Urai, Barisuak sakali denai pai-kok untuang lai di rumah!"
Habih rundingan hinggo itu-lah bajalan si Kayo Urai-taruih sakali mudiak labuah-manyampaikan mukasuik hati-mamintakan ubek cucunyo-kaurang dukun di Babuai.
Lorong kapado Aciak Cipeh-indaknyo mambuang hari-niaiknyo nak capek sampai-taruih sakali inyo bajalan-pai ka kubu Paniang-paniang ka rumah Datu Banyak Barang-kawan karik sajak dahulu. Lah sampai inyo di sinan-barundiang sakali baduo-duo rundingan capek sasuainyo-bakato sanan Aciak Cipeh,
- "Mano Datu Banyak Barang-ado nan ka den sampaikan-barisuak ado urang kadatang-datangnyo dari Balaigurah-namonyo si kayo Urai-nak mamintak ubek pakasiah-sabab minantunyo jarang pulang-sajak inyo babini baru. Iko denai mambao ubek-iyo kabaji jo pakasiah-Datu sampaikan ubek nangko-kapado si Kayo Urai-katokan pulo kapado-nyo-caro mamakai ubek nangko. Ubek ko duo tabao-pakasiah bakeh Bungo Alai-kabaji bakeh Puti Intan. Nan buliah
mamakan ubek nangko-iyo Pamuncak Sutan Maka-jo padusinyo Puti Intan-nan lain urang indak buliah. Sabuah pulo pitaruah den si Kayo Urai usah tahu-bahaso den mambarikan-rusiakan bana tu dek Datu. Iko ajek Datu isaraiknyo!"
