Mandanga pasan Aciak Cipeh-bakato Datu Banyak Barang,
"Sabanyak pasan Aciak Cipeh-maalum denai kasadonyo. Kok datang inyo ka mari-nak den sampaikan ramuan ko-den tarangkan malah jaleh-jaleh."
Sananglah hati Aciak Cipeh-Datu bajanji manolongnyo- kamalangsuangkan niaik jaheknyo-lalu babaliak inyo lai.
Sungguah setan Jilatang Kampuang-iyo bana ibilih kinciak-bantuaknyo sajo nan bak urang. Bukan kabaji dibaonyo-bukan pakasiah disarahkannyo-kapado Datu Banyak Barang-tapi racunnan babiso-pambunuah Pamuncak Sutan Maka-baduo jo Puti Intan-iyo pambalehkan sakik hati-Tuan Bujang Sutan Nan Sati-nan dibari kato harok-dek Aciak Silaro Aceh.
Barisuak pagi harinyo-kiro-kiro pukua sambilan-lah bajalan Kayo Urai--pai ka kubu Paniang-paniang-nan bak pitunjuak Aciak Cipeh--bukan buatan sanang sakali naiak rumah-disambuik Datu Banyak Barang.
"Dari mano Biainyo datang-sia namo dihimbaukan-apomukasuik jo sangajo-nangko sampai datang ka mari!"
Manjawab si Kayo Urai, "Tuan Datu Banyak Barang-hambo nangko si Kayo Urai-biai si Rono Bungo Alai-datang nan dari Balaigurah. Sangajo manjalang Tuan Datu-nak mamintak bicaro Tuan-mamintak ubek jo panawa. Suami anak kanduang hambo-bagala Pamuncak Sutan Maka-inyo babini baru pulu ka kampuang Piliang Tangah-ka rumah si Upiak Puti Intan. Saketek hambo rusuahkan--sajak inyo babini baru lahi tagantek inyo pulang--anaknyo damam indak disilau. Baitu pulo Bungo Alai dek salalu manahan hati-badannyo baransua kuruih-lalok kurang makannyo kurang. Nan sakarang iko kini mamintak sipaik pado Tuan-apo nan patuik dilakukan-kok sakik nak buliah tawa-kok rusuah mintak dipujuak hambo pulangkan bicaroko-iyo kabakeh Tuan Batu Bakaua tanpek nan kiramaik mamintak tampek nan kabuliah-itu hana nan pintak hambo!"
Lorong Datu Banyak Barang - lah sudah kato didanga - lalu bakato inyo.
