Sakariang-kariang aia mato-manangih juo maratok juo-urang lah tahu suok-kida. Sungguahpun hari laruik malam-mandanga ratok nan bak kian-sanak-sudaro nan dakek-dakek-abih naiak ka ateh rumah-samo manangih kasadonyo-dek sayang ka Puti Intan-rusuah rasonyo kabacarai. Sampai pagi indak nan lalok-sadiah nan indak tatahankan. Samo batanyo dalam hati-apokoh sabab karanonyo-inyo mati suami.mati. Banyak urang nan maraso-matinyo mati basabab-mungkin dek baleh sakik hati-sabab kandaknyo indak lalu. Tantang matinyo Puti Intan-baitu juo suaminyo-mungkin dibari urang racun-babagai-bagai pandapek urang.
Sadang baliau Datuak Bungsu-sarato Datuak Rajo Sakampuang-duduak tamanuang kaduonyo-banyak pikiran nan mandatang. Dikaji sajak samulo-sajak langkah diayunkan-babagai bincano tibo-mulonyo mati Ambuang Baro-babaleh ka Canduang Koto Laweh-Sutan Rajo Talauik Api-indak tantu sia mambunuah mati Pamuncak Sutan Maka-babaleh pulo bakeh awak.
Lah pai pulo Puti Intan-dirangkai-rangkai dipatalikan-mungkin bapangka dari awak. Tapi manjadi tanyo-tanyo-apolah garan manyababkan-kematian Pamuncak Sutan Maka-baitu pulo Puti Intan-indak ado nan dapek manjalehkan-tingga di dalam hati sajo.
Lah siang candonyo hari-pacahlah kaba dalam kampuang-tantang matinyo Puti Intan. Babondong-bondong urang datang-labiah-labiah anak rando gadih-kawan-kawan samo gadangnyo-samo tagamang kasadonyo banyaklah urang nan manangih—bunyi- bisiak badasuih-dasuih.
Lah tinggi candonyo hari-urang lah samo bakarajo-kok papan alah baukua-kain putiah alah bacabiak-satangah manggali pakuburan. Lah siap urang mamandikan-dikapani lalu disambayangkan dibujua di tangah rumah. Allahu Rabbi rami urang-sasaklah rumah nan gadang-di halaman lah rami pulo-samo dalam karusuhan.
Diangkek malah hanyo lai-dibao turun ka halaman-diusuang basamo-samo-dihantakan sampai ka pusaro-iyo di pandam pakuburan badakekan jo rangkayo Ambuang Baro.
145
