'BAB VI
Baraliah kaba ka masarakaik-dalam nagari Balaigurah-sajak mati Puti Intan—samo jo Pamuncak Sutan Maka—banyak lah urang nan tapikia—rintang batanyo-tanyo juo—apokolah nan jadi sabab—mangko mati nyo sarangkek sajo—indak tarago sakik-sakik.Banyaklah bisiak dangan dasuih—mangatokan inyo kanai racun—tapi indak tantu pulo—dari ma datangnyo racun.
Timbua pikiran dalam hati—dek Niniak Mamak dalam nagari—Panghulu Urang Nan Sapuluah—dalam nagari Balaigurah-nak manyilau manyiasek—mamareso pangka jo sabab—muloi sangketo ka babatang—asa karajo ka pokok. Dek Niniak Mamak Rang Sapuluah diadokan malah karapatan—batampek di Balai Panjang itulah Balai nan tatuo—dalam nagari Balaigurah.
Di hari nan lah ditantukan—hari Akaik patang hari—lah hadia sagalo Niniak-Mamak—iyo Panghulu dalam nagari-pusek jalo pumpunan ikan—aia janiah sayaknyo landai—kusuik tampek manyalasai-karuah tampek mampajaniah—tampek mamintak biang tabuak—tampek mamintak gantiang putuih-kapai tampek batanyo—kapulang tampek babarito—dek anak kamanakannyo.
Lah bulek malah mupakaik—rapek dibukak maso itu—dek angku Datuak Putiah Panghulu suku rang Simabua—lalu manitah lah bahau,
- "Mano Datuak Bandaharo—mano Datuak Maharajo—Niniak Urang Nan Sapuluah—nan hadia dalam rapek nangko, Karano kito lah cukuik datang—kok ado nan taraso di hati—nan takilan pado mato alahkoh patuik hambo sabuik? Jawab dimintak pado Datuak kapado sagalo Niniak-Mamak-Panghulu nan salingka duduak!"
Manjawab Datuak Bandaharo—Panghulu dalam suku Jam—bak bakato sambia basitinah,
"Mano Tuan Datuak Putiah—sarato nan hadia dalam rapek.
148
