Lalu bakato Datuak Putiah―nan dituokan dalam sidang,
"Mano kito nan rapek ko! Mandanga rundingan nan ka tangah―baiak dek Datuak Maharajo-atau dek Datuak Bandaharo―lah dapek kito bayangan-lah basuriah bak sipasin-alah bajajak bagai bakiak. Kok lai sasuai jo karapatan―kito cubo manyalidiak-dicubo dulu maninjaunyo―ka urang batigo nantun. Kok nyato inyo nan babuek―mambuek kacau di nagari―tantu basuo kato papatah nan bungkuak dimakan saruang. Jokok kito lai sasuai―disuruah dubalang Adaik―manjapuik urang-urang nantun-disuruah datang ka Balai ko―mahadok rapek Niniak Mamak. Baa pikiran nan basamo!"
Bakato Datuak Bandaharo, "Manuruik pandapek hambo―itu rundiangan sabananyo―lah tampak barih kadituruik―tabayang jalan ka ditampuah. Patuik dijapuik suruah japuik―disuruah dubalang Adaik―mambao inyo ka mari―mangadap Basa jo Panghulu―di dalam rapek kito nangko―nak capek salasai karajo ko nak jan rusuah batambah-tambah―itu di hambo nan takana—bana dimintak ka nan rapek!"
Bakato Datuak Maharajo, "Mano Niniak dangan Mamak! Manuruik pikiran hambo-rundiangan di hari nangko-bak raso hampia salasai-dibulekan kato jo mupakaik-mamanggia urang nantun--dihadokan dalam sidang Niniak-Mamak. Kok lai sasuai jo nan rapek-di hari Kamih nan di muko-diulang malah rapek nangko-disuruah dubalang Adaik―mangisakan Niniak dangan Mamak-Panghulu Urang Nan Sapuluah—rapek-papek kasadonyo―surang usah katinggalan baitu pandapek hambo―pulang putusan ka nan rapek!"
Habih rundingan Datuak Maharajo―bakato baliau Datuak Putiah―katuo dalam karapatan,
"Mano Niniak dangan Mamak-sidang nan hadia samuonyo. Manuruik bunyi nan didanga-dari Niniak-Mamak kito-tahadok rapek kito nangko-rundiangan bak raso lah sampai―lah bulek aia ka pambuluah―lah bulek kato jo mupakaik―sabuah indak nan batupang―hambo di dalam itu pulo. Kito
151
