↓Laman ko alah sah
- putuihkan kini nangko―bahaso rapek kito ulang―di hari Kami di muko ko.
- Baa sakarang kini nangko―rundiang sudah paham talatak―baurak selo malah kito!"
Dialiah pulo pakabaran―kununlah Jilatang Kampuang―hiduang tajam talingo nyariang―kironyo inyo lah mandanga―Niniak-Mamak ka basidang―nak mancari sangketo nan tang―iyo karajo nan bapangka―tahadok kamatian Puti Intan―jo Pamuncak Sutan Maka. Ditamuinyo Tuan Bujang―bakato cando urang takuik,
- "Tuan Bujang Sutan Nan Sati―tagageh-gageh hambo datang―gadang mukasuik nak basuo―nak barundiang jo Tuan Bujang.Di patang hari sabanta ko―hambo pai bajalan-jalan dek hati ragu-ragu sajo―pikiran kusuik tak manantu―'ndak tantu sabab karanonyo! Hambo pai ka Balaigurah―lalu ka hilia Gurun Pandito―marereh ka Balai Panjang―kironyo urang sadang rapek―Niniak-Mamak dalam nagari―Panghulu Urang Nan Sapuluah―rapek papek kasodonyo. Dek ingin hati nak mandanga―mahampia-hampia hambo kian―mahandok-handok di balakang―talingo hambo panyariang juo. Di dalam buah parundingan―tasabuik-sabuik tikam-bunuah―tabaco-baco upeh-racun―kamatian Bujang Ambuang Baro―sarato Pamuncak Sutan Maka―baitu juo Puti Intan.
- "Putusan rapek Niniak-Mamak―jaleh tadanga di talingo―bahaso kito nan basalah―batigo jo Datu Banyak Barang―nan manjadi biang kaladi―kito nan jadi pangka bala. Kito batigo kadipanggia di hari Kamih nan katibo―kadiusuik-disiasek―tahadok tubo dangan racun. Kok dapek tando jo beti―nyatolah kito kadihukum―iko nan hambo takuikan bana―baa kini nan ka elok?”
Mandanga curaian Aciak Cipeh―tagamang bana Tuan Bujang malu tibo takuik pun datang-malu dirusia katabukak―takuík disalah kabatimbang―nyato kok utang kababaia. Barala kagadang malu-diri―dipanggia karapek gadang―dipareso Niniak jo Mamak―di muko sidang nagari. Sanan bakato Tuan Bujang,
152
