↓Laman ko alah sah
- Dicari pangka jo sabab—iyo dek ulah muluik juo—Cipeh muluik Silaro Aceh—inye mananam kacang miang—manggata urang sanagari. Kok indak sato Aciak Cipeh—kuman nan balun jadi bisua—kok bisua alun kamalatuih, Batigo kito nan tatuduah—Jilatang Kampuang nan maragi—tuan-tuan tabao rendong.
- Kini baitu hanyo lai—kok lai banyak siso racun—kito minun kito abihkan—bia di hambo dibanyakan—nak hilang Jilatang Kampuang—nak sanang urang nan tingga.
- Putuih rundiangan nan batigo—’ndak ado manti nan barulang—indaklah hakim nan mahukum—inyo mambuek pangadilan—mahukum diri-sandiri. Malu diuleh kamangasan—takuik dibuhua kababuku—lalu sarangkek minun racun-di ateh rumah Tuan Bujang—surang pun indak urang nan tahu—racun nan biso bakarajo—lah jadi maik katigonyo...
- ”Dari Nareh ka Ikua Lubuak,
- dari Padang ka Bukik Putuih,
- ka suok jalan ka Muaro;
- sadang paneh hujan badabuah,
- sadang parang sangketo putuih,
- hukum Jah jalan sandirinyo.”
Barisuak pagi harinyo—tahulah kaum Tuan Bujang—tahulah urang suok-kida—bahaso inyo lah dahuJu—lah takampai batigo-tigo. Batambah rami urang nan datang—samo mancaliak maik nantun—pacahiah kaba di nagari—sampai ka kampuang Balaigurah—tahulah Niniak dangan Mamak—Panghulu Urang Nan Sapuluah—bahaso urang nan dituduah—lah samo mambaia utang—utang nyao baia jo nyao—utang racun baia jo racun.
Basuo pulo di hari nantun—iyo baliau Datuak Putiah jo baliau Datuak Maharajo—sarato Datuak Bandaharo—di medan di Balai Panjang-sanan bakato Datuak Putiah,
- ”Mano Datuak Maharajo—mano Datuak Bandaharo—manuruik janji nan ditakuik—ataupun padan nan diukua—jo Niniak-Mamak Sapuluah-ka mamanggia urang nan batigo. Nan
156
