"BAB I"
Dikanduang jaman nan lah lamo-di kampuang Piliang Tangah-dalam nagari Balaigurah-bilangan Urang Nan Sapuluah-dalam daerah Ampek Angkek- iyo di dalam Luhak Agam di daerah Alam.Minangkabau adolah urang nan tasabuik-tabincang kanan jo kiri-urang kayo asa-barasa-urang gadang sunduik basunduik—
urang kayo suko dimakan-lai ka tampek salang-tenggang-pauleh di musim senteng-panyambuang di maso putuih-lai arih bijaksano-pai ka tampek rang batanyo-pulang ka tampek babarito-iyo saurang parampuan-urang tuo di kampuang nantun- banamo Aciak Silaro Aceh. Inyo baduo badunsanak-baradiak surang laki-laki-bagala Datuak Rajo Sakampuang-Panghulu dalam sukunyo-di dalam suku Piliang-di kampuang Piliang Tangah-dalam nagari Balaigurah.
Adok Aciek Silaro Aceh-lai baranak duo urang-anak nan bagai anak balam-nan gadang anak laki-laki-banamo Gombang Ambuang Baro-umua nan alah duo puluah. Nan ketek iyo parampuan-banamo Gondan Puti Intan-umua nan baru tujuah baleh.Bapak bagala Datuak Bungsu-urang gadang dalam sukunyo- iyo di dalam suku Guci-bilangan Urang Nan Sapuluah-dalam
nagari Balaigurah.
Pihak di anak nan duo nantun-jadi pamenan patang pagi- kasayangan ibu jo bapaknyo-anak rang masak pangaja-dadonyo panuah dek ilimu-jiwonyo kayo pandidikan-tahu diereng dangan gendeng-tahu dibayang kato sampai-sarato arih bijaksano-tiru tuladan di nan banyak. Tahadok tingkah jo lakunyo-atau piia buatannyo-jarang rang mudo manyamoi-dalam kampuang satumpak nantun. Laku baiak taratik mulia-jadi pujian di nan banyak. Takuik ka ibu dangan bapak-haromaik ka urang tuo-tuo-
panyayang ka urang kampuang-paibo ka urang miskin-ringan tangannyo nak mambari-rilah hatinyo nak manolong-capek kaki ringan tangah-satu pun alun ka caceknyo.Templat:Nop
19
