kan-indak kau danga baritonyo-pihak salorong balai Akaik-bukan balai rang manggaleh-balainyo rami dek rangmudo-pakannyo sasak dek rang bujang-panuah dek urang mulia-mulia. Pakan 'ndak patuik Upiak tampuah-takuik lah denai kamambao-urang mudo banyak hikamaik-urang bujang banyak manawan-anak anak kok bimbang kamudian-eloklah anak tingga di rumah.
Mandanga jawab biai kanduang-kununlah Gondan Puti Intan tamanuang inyo sakutiko-tamumuak raso paratian taheran raso dalam hati-lalu bakato maso itu,
"Manolah garan Biai kanduang-usahlah itu biai rusuahkan usahlah biai gamang bana-niaik sangajo nak ka pakan-bukan malapeh pamandangan indak mancaliak urang rami. Hanyo nan niaik hati hambo-hambo ingin mambali suri-suri kaluih karok salipek-buatan tukang di Biaro-surinyo elok kato urang.
Sabagai pulo Biai kanduang-iko moh gadang dek nasi sekali alun pai ka balai-gadang di ateh anjuang sajo gilo batanun patang hari. Baa tampannyo rang mambali baa lakunyo rang manjua tabo di mano diambiaknyo-alun lah ado- dipandangi itu sangajo hambo pai-bagio sampai suruik sajo. "
Lorong dek Silaro Aceh-mandanga kato Puti Intan tabana pulo dalam hati; sungguah samantang pun baitu―dicubo juo mailakan-lalu bakato maso nantun,
"Apo bana ka anak caliak-apo bana nan kadibali-kunun mambali asam-garam-kalangkapan di dalam rumah-itulah baban badan denai-balunlah Upiak denai asankan-salamo
denai lai bagogo-bialah denai hilia mudiak-sananglah Upiak ateh anjuang."
Sanan manjawab Puti Intan--sambia mamandang ka biainyo pandang manaruah pamintaan, "Biai juo janyo hambo sabanyak kato Biai nantuan-lah iyo pulo tu kironyo-tapi semantangpun baitu-hambo mandanga baritonyo-di balai diTemplat:Left
