duik mato-lah tampak sajo congkak awak lah tampak hati baraninyo usah ditiru nan baitu:
Sicerek rambahlah paku,
nak tarang jalan ka samak;
sajak ketek paelok laku,
nak sayang urang ka awak.
Sarasah jalan ka Tiku,
Tuan Katik pulang bakudo,
kudonyo balang rajah kaki;
usah buruak karano laku,
jan cacek karano baso,
baso nan indak kamambali."
Manjawab sanan Puti Intan, "Sabanyak pitaruah Biai nantun hambo amakan kasadonyo-salamo hayaik di kanduang badan!"
Sadang barundíang-rundiang juo-mangecek sambia bajalanlah jauah malah pajalanan jauahlah batambah dakek-kok dakek lah hampia sampai-lah tibo di pintu pakan-iyo di balai pakan Akaik di ranah di Tujuah Suku-lalu sakali masuak pakan. Di hari sahari nantun-sapanggalah matohari naiak-kiro-kiro pukua sapuluah Allahu Rabbi rami pakan-sasak nan bukan alang-alang- panuah dek anak mudo-mudo rami dek anak rando gadih anak rang kayo tak tahetong-namonyo urang ka Puaso-tiok tahun tatap baitu-tampek nan mudo basando gurau-tampek manuka pamandangan-bagadang hati kasadonyo.
Lorong Aciak Silaro Aceh-sarato dangan Puti Intan-lalu juo ka tangah pakan-sambia mamandang suok-kida. Bakato Silaro Acch kapado anak kanduangnyo, "Mano Upiak Puti Intan-paliangkan mato kiri-kanan--lihek indahnyo balai urang-parik batu bakuliliang-paganyo condong sanda lamang-batang baringin atok tungku iyo di tangah balai nangko-tinggi indak randah pun indak sarupo pajuang dikambangkan. Cando kamuniang randah-randah pudiang ameh paga di dalam-pudiang perak paga di lua-ruku-ruku badindiang mudiak-sikasok badindiang hilia-
31
