↓Laman ko alah sah
Lalu bajalan malah inyo-iyo Aciak Silaro Aceh-sarato Gondan Puti Intan di tangah balai rami nantun. Lah payah hilia jo mudiak-sabuah alun mambali-sanan bakato Puti Intan,
- "Biai jan rintang dek mancaliak-jan rintang barundiang juo molah kito mancaliak suri-usah bahabih hari juo!"
Alah bajalan anyo lai-mancari kadaian suri-sarato tibo inyo di sanan-batanyo Aciak Silaro Aceh,
- "O Tuan urang manggaleh-lai suri nan rapek gigi-suri aluih karok salipek-patanun kain kendang-kendang buatan tukang di Biaro?"
- Manjawab urang baniago, "Kini ndak ado urang mambuekantah kok hari Akaik datang-kok lai hambo pasankan. Dima garan kampuang Aciak-atau rumahnyo anak nangko-nak tantu hambo mamasankan!"
Manjawab Silaro Aceh,
- "Kok dapek Tuan bapasan-kampuang halaman hambo nangko-iyo kampuang Piliang Tangah-dalam nagari Balaigurah.Kok lai tampek bapasan sabuik kan namo anak nangko iyo Upiak Puti Intan karano inyo ka mambali!"
Sanan manjawab urang manggaleh,
- "Jokok baitu kato Aciak-Insya Allah hambo pasankan!”
Bajalan pulo kaduonyo--hari basarang tinggi juo-panch nan bukan alang alang-sanan bakato Puti Intan,
- "O Biai molah kito pulanglah latiah raso badan hambo sabuah indak nan tabali-Ciek pun indak nan katuju-Bak nangko malah pakan urang-aia gadang sampan tak anyuik galeh banyak barang tak laku-alamaik toke kamarugi.
Malang hambo pai ka pakan jokok di rumah hambo cako salipek tanun alah sudah."
Mandanga kato nan bak kian bakato sanan biainya,
- "Mano kau Upiak Puti Intan jan dicacek pakan urang usah kabanyak disasai. Layangkan pandang kiri-kanan pandanglah ragam tangah pakan-liheklah piia laku urang baiak
33
