nyo ka Piliang Baruah Kubang taruih ka rumah inyo sakali iyo ka rumah pambujangan-duduak tamanuang di barando hati nan indak tasanangkan sindiran tatanam dalam hati bak duri di dalam dagiang bak tulang dalam rakuangan antah pabilo kahilangnyo.
Kito tinggakan sakutiko-Tuan Bujang Sutan Nan Sati sadang duduak bamanuang surang-rintang mangana-ngana diri sindia kiasan nan maragu-duduak rumah pambujangan. Tantang Aciek Silaro Aceh-sarato Gondan Puti Intan-taruih bajalan anyo lai-mahiliakan labuah nan panjang-manuju nagari Balaigurah.Alah sabanta inyo bajalan-mangucap Silaro Aceh sarupo urang takajuik-takana rundingan cako-kucikak ka Tuan Bujang-tumbuah sasalan dalam hati-nyato awak alah tadorong-kato lah banyak nan talompek sindiaran banyak nan kalua-hadok kadiri Tuan Bujan Takuik tibo cameh pun datang-kato kok indak batapeti-ameh kok indak bapurokan antah baa kasudahannyo… sanan bakato ka anaknyo,
- "Manokau Upiak Puti Intan-malang cilako muluik nangko indak den aso den sangajo-talanjua denai barundiang talampau badan bakucikak-takana kato nan tadorong den lihek jo suduik mato agak jamalu Tuan Bujang nyato barubah ka mukonyo-mandanga kecek denai cako. Kok inyo bao masuak hati-bara kamalu diri denai-indak patuik inyo den sindia inyo sasuku awak pulo. Tambahan inyo basahabaik-iyo jo bujang Ambuang Baro-baa kolah kasudahannyo!"
Kununlah si Puti Intan-salamo biainyo bakucikak-jo Bujang Sutan Nan Sati-manakua sajo inyo bajalan-takuik mandanga rundingan tu. Mandanga kacamehan biainyo-sanan bakato Puti Intan,
- "Hambo 'ndak tahu tantang itu antahnyo malu antah indak tapi barubah ka mukonyo, Manga kini Biai manyasa baa Biai sampai tadorong Biai pandai mambandiangkan urang sabagai kato Biai juo,
