↓Laman ko alah sah
B A B II
Birawari Bujang Sutan Nan Sati-cadang tamanuang-manuang surang, iyo bak pantun tukang kaba,
Sajak mandanga kato sindia aia diminun raso duri nasi di kunyah raso sakam hati rusuah roman bakucak jaleh mambayang di mukonyo. Sadang inyo bamanuang nantun-tadanga urang mahimbau-bunyi suaro parampuan banamo Cipeh Jilatang Kampuang bak cando urang mambali padi-mambao karuang jo sumpik.
Tadanga urang mahimbau-tasintak garan Tuan Bujang tasintak dari manuangnyo lalu tagak ka muko pintu-dihimbau naiak urang nantun. Lah naiak inyo Aciak Cipeh-lalu duduak mangunyah siriah-mamandang inyo tapek-tapek sadang ka diri Tuan Bujang lalu batanyo malah sanan,
- "Tuan Bujang Sutan Nan Sati-batanyo hambo saketek datang di mano Tuan cako-apokoh garan nan marusuah hambo lihek hambo pandangi-agak barubah roman muko atau kok Tuan dapek damam atau kok sakik ngilu paniang bari barito malah hambo!"
- Kunun di diri Tuan Bujang-mandanga tanyo nan bak kian tabukak raso kiro-kiro-badala cando paratian-papeh kok lai dapek tawarusuah kok raso ka baubek-lalu bakato anyolai sambia maharang gadang-ketek,
