- "Aciak Cipeh Jilatang Kampuang-indaklah badan salah banang-indaklah sakik ngilu paniang-rupo barubah dek basabab-badan bak raso bayang-bayang milukuik sagadang atah-panjahik sagadang alu-dangakan banalah dek Aciak. Pai ka balai ka pakan Akaik-mambali santo jo daun. Satibo di pintu pakan-mahadok jalan ka pulang-sairiang hambo jo urang tuo iyo Aciak Silaro Aceh-urang Piliang di Balaigurah inyo baduo jo anaknyo-jo si Upiak Puti Intan. Mangecek sambia bajalan-hambo batanyo luruih-luruih-hambo bakato bana-bana jo sindia sajo dijawabnyo-sambia bagarah ba kucikak. Banyak katonyo nan tadorong-banyaklah sindia nan manganai-tahadok ka badan diri hambo. Hambo dibari kato harok-barang tak patuik dibaconyo-labiah-labiah dakek anaknyo-malu rasonyo hati hambo-mandanga kato jo kiasan-bak raso hambo tajun bana-bakeh nan Gondan Puti Intan sampai kini tangiang juo-kato sindiran jo harapan-antah pabilo kahilangnyo-pulang maklum pado Aciak!"
Loronglah inyo Aciak Cipeh-mandanga curaian Tuan Bujang-sanang rasonyo paratian-sebabnyo mangko baitu-sasuai namo jo galanyo-Aciak Cipeh Jilatang Kampuang-tukang asuang tukang pitanah-inyolah nyato jungkek patiang-ambiak sinan bao ka mari-gojak sinan patiang di siko-sahinggo akia kalaknyo-barang nan luruih jadi bungkuak-nan putiah amuah jadi hitam-barang nan janiah jadi karuah-sangketo tumbuah dalam kampuang kacau-balau dalam nagari-bia tajadi tikam bunuah ataupun cakak jo kalahi itu nan inyo cari bana-alun inyo basanang hati bilo tak ado huru-haro bilo nagari aman sajo. Mandanga parasaian Tuan Bujang-inyo maraso sanang bana-lah ado jalan nan tarantang-lah tampak gunjai kadiuleh-lah nyato ragi kadiubah-lalu bakato malah inyo-mamasuakkan puntuang jo haruman supayo api naknyo garang di siko inyo dapek jalan-bamulo inyo bakarajo, "Tuan Bujang Sutan Nan Sati-patuik barubah muko Tuan rupo karuah badan takucak-dapek panyakik malah Tuan-dapek sangsaro moh kironyo. Lah dek a garan urang nantun-sakik kapato ko lah inyo atau kok inyo mereng utak-mangko katonyo lalu sajo. Indak disangko ka baitu-iyo Aciak Silaro Aceh-namonyo.
40
