inyo urang tuo-lai arih leh bijaksano-tahu diereng dangan gendeng-tahu dirantiang kamalata-tahu diranggeh kamancucuak. Indak patuik inyo tadorong-alun tampeknyo inyo talanjua-sadang ka diri Tuan Bujang-awak sasuku-sako pulo. Sungguah samantang pun baitu-usah awak bahati cameh-untuang kok iyo bak katonyo-kok leh sasuai rueh jo buku-bagai kapuran jo saoknyo bak dulang jo tuduang aia-mangucap sukur malah kito. Tapi pulo Tuan Bujang-jaleh kok indak bak katonyo-ameh kok indak bapurokan-kato kok indak ba turuiki-lah patuik bana pado Tuan-bak kato urang tuo-tuo gilo kalang gilo tumpuan-indak jadi dibao sanang-indak patuik badiam diri-patuik di hari digantihkan-lakek bak bunyi pantun urang:
"Bingkudu di tapi pasia,
badaun sahalai duo;
'ndak lalu sampan diaia,
di gurun tenjakan juo."
Sabagai pulo Tuan Bujang-indak inyo mandanga-danga alun kok panah inyo malihek-urang mamanjek-manjek dindiang manjadi juhuang jo sijundai-sampai manjadi gilo pasiak-iyo rang gadih jolong gadang-dek cipeh muluik biainyo juo-bakeh rang mudo jo rang bujang.
Tapi samantang pun baitu-pihak Aciak Silaro Aceh lah untuang pulo inyo saketek-bakeh Tuan inyo tadorong-lurah bak raso tak babatu-ijuak bak raso tak basaga-katonyo indak kabajawab. Jokok santano ka nan lain-bakeh rang mudo nan bahati suka bayo mangatokan-antah tak lalok siang-malam. Tapi di Tuan jan baitu-hati tarabo disuruikan kok paneh bao barado-elok awak bahati saba-urang mukmin kasihan Tuhan. Nan sakarang kini nangko-hambo nak pulanglah dahulu harilahı sirok rambang patang-kok ado apo nan paralu-Tuan pasankan malah hambo!"
Bakato sanan Tuan Bujang-manjawab sambia bapasan, “Jo kok baitu kato Acíak ka baa pulo kato hambo-hambo lapeh Aciak bajalan hanyo sabuah pintak hambo-tahadok rundingan cako lapuak diparuik Aciak surang usah tahu urang nan lain-
41
