kok ado pulo urang nan tahu batambah gadang malu hambo.Sabuah lai pintak hambo-jokok Aciak lai bakalapangan-kok lai bicaro nan paralu-jan sagan Aciak ka mari tolong jo budi badan hambo!"
Manjawab sanan Aciak Cipeh, "Insya Allah hambo tarimo-kok lai rundingan nan basakik-sugiro malah hambo datang. Nan kan sakarang kini nangko-hambo bajalan lah dahulu!"
Lah turun inyo ka halaman-Aciak Cipeh Jilatang Kampuang-lalu bajalan anyo lai-manuju tampeknyo tingga-sambia galak tasanyum surang-gadang hatinyo bukan kapalang-mandapek karajo baru-lah tampak jalan kaditampuah-lah buliah pulo nan di hati-namunlah Aciak Jilatang Kampuang-asa karajo lah bamulo-patah di tangah pantangannyo-alunlah inyo sanang diam-sabalun bakasudahan.
Kito bapaliang lah sabanta-ka kampuang Piliang Tangah ka rumah Aciak Silaro Aceh-lah sudah urang makan malam duduak-duduak inyo sabanta-iyolah baliau Datuak Bungsu bapak nan Gondan Puti Intan-anak lah, masuak ka biliaknyo di ujuang rumah nan gadang tu. Sahabih siriah nan sakapua-lah padam rokok nan sabatang-lalu disabuik nan taraso-sadang dek Aciak Silaro Aceh-sambia barundiang-rundiang ketek.
"Katuri di dalam samak,
bao ka banda mancucinyo;
padusi kato malunak,
maharok rilah suaminyo."
Tuan Datuak Bapak si Upiak-lai sabuah nan taraso tagurih-gurih dipikiran-nan patuik hambo katangahkan. Pai ka pakan hambo cako-jo si Upiak Puti Intan-inyo manuruik hambo bao- inyo nak mambali suri-sambia mancaliak rami pakan. Allahu Rabbi rami pakan panuah dek anak mudo-mudo-sasak dek urang mulia-mulia anak rang kayo tak tahetong. Hambo lihek hambo pandangi kama juo kami bajalan-angkuah rang mudo kasadonyo ataupun urang baiak-baiak condong kabakeli anak kito tajam-tajam pamandangannyo bakeh si Upiak Puti Intan. Lah hambo
42
