- banyak pitaruah jo umanaik Upiak pacikan taguah-taguah.Nan sakarang kini nangko simpanlah banang jo makauko basegeh malah ka dapua hari baransua patang juo!”
Basintak tagak anyo lai iyo nan Gondan Puti Intan pai karuang pandapuran lalu mamasak jo manggulai manyadiokan apo nan paralu untuak santapan patang hari. Lorong Aciak Silaro Aceh batuka kain jo baju lalu ka sungai pai mandi maambiak aia sambayang wakatu asa hampia abih.
"Baranti balapeh lalah,
siriah talatak di carano;
sungguah pangasiah Tuhan Allah,
barang dimintak dibariNyo.
Adolah pado suatu malam bulan nan tarang sajak sanjo lah sudah minun jo makan iyo baliau Datuak Bungsu sarato Aciak Silaro Aceh batigo jo Bujang Ambuang Baro duduak-duduak di ruang tangah nan Gondan lah pai ka biliaknyo sanan bakato Datuak Bungsu iyo madok ka Ambuang Baro,
- "Manolah Buyuang anak kami nambek dahulu nak bajalan kami nak barang dikatokan!"
Mandanga kato Bapak kanduang takajuik inyo Ambuang Baro rupo barubah sakutiko heran tibo takuik pun datang darah nan indak sanang lai lalu bakato maso itu,
- "Mano Bapak manolah Biai agak badabok darah hambo bana kok ado nan taraso ereng gendeng jiguah jo pangkuah atau tadanga buruak baiak lah patuik hambo bapak tagua lah patuik Biai maajari laku parangai sumbang salah ataupun tingkan laku hambo hambo sadio maubahi. Kok lai hambo jalan sasek ataupun langkah kok nyo salah kok sasek hambo nak suruik talangkah hambo nan kumbali.
- Rantang bantangkanlah dek Bapak tunjuak katokanlah dek Biai nak sanang pulo hati hambo!"
Dek baliau Datuak Bungsu sarato Aciak Silaro Aceh tagalak malah kaduonyo mandanga jawab anak kanduang sanan bakato lah bapaknyo,
50
