limbago jadi urang samando baokan lilin jo sidingin kok basuo silang salisiah nan ratak anak patauikan-kok leh untuang mudah-mudahan nan ratak kok leh batauik nan kusuik kok leh salasai,
Limbak nan daripado itu kok tumbuah elok jo buruak di sinan budi ditampakan tangan nan usah dipabarek capek-capek anak manolong tampakan hati nan jujua-hati mintuo nak nyo sanang. Adaik manjadi urang samandi diam di rumah tanggo urang bagio rajo di kampuang bagio sutan di nagari namun di dalam kampuang urang manjadi anak kamanakannyo. Adaiknyo patuik kito turuik limbago samo dituang cupak nan samo kito isi kok kayo usah ditampakan indaklah urang kamamintak bukanlah urang kamanyalang. Kok cadiak usah dikatokan urang nan indak kabatanyo-hanyo nan jadi utang kito mambilai tampek nan senteng manukuak tampek nan kurang itu hanyo kuaso kito.
Banyak pulo garan macamnyo nan digalakan bakeh rang samando ado samando niniak mamak ado samando bapak paja ado samando kutu dapua ado samando kacang miang banyak nan lain tak bapak sabuik cukuik lah hinggo itu dulu kok ado tukuak tambahnyo mintaklah bakeh Biai anak!"
Sanan mahadok Ambuang Baro-sadang kapado Biai kanduang mintak pitunjuak jo pangaja ka tukuak tambah nan lah ado. Bakato Silaro Aceh,
- "Mano pulo dek ang Buyuang-dangakan juo jaleh-jaleh nak den tambah saketek lai panukuak nan banyak cako.Limbago urang jadi samando-iyo urang barumah tanggo kalau lah jatuah ijab kabua lah jadi sadarah jo sadagiang lahia batin indak barubah-jadi sahino jo samalu samo ma nangguang sakik sanang-kok lai samo dimakan nan indak samo dicari. Kok untuang pambari Allah anak samando keh nan kayo di sinan budi anak pakai-kariang jan tampak ka mahiruik ratak nan usah kapanehan-manyalang memintak jangan paliang pajuah usah dipakai pantangkan bana tu nak kanduang:
55
