buah mimpi hati lakek pandanglah sudah indak dapek diputa lai rupo nan indak namuah hilang sabuah indak nan takakok kini baitu nan tadanga lah masuak setan jo ibilih lalu bakato inyo lai,
"Baitu malah nan tadanga patuiklah inyo aniang sajo Aciak Salaro Aceh nantun basuo inyo malengah batamu indak basapoan jauah bana parubahannyo dalam sabulan duo nangko. Sutan Rajo Talauik Api itu sahabaik hambo bana sajak ketek kami babaua tiok pakan kami basuo indak tabatiak tabarito bak raso nan kabuliah iyo si Upiak Puti Intan. Kini baitu lah di Aciak mamintak hambo sungguah-sungguah carilah tenggang jo kalaka hati sakik nak baubek nan malu nak nyo tatuntuik. Cubolah Aciak bausaho pai ka Datu Banyak Barang dukun nan banyak ilimunyo mintak ramuan jo kabaji supayo nak putuih hubungannyo nak nyo bakuak urang nantun kok untuang lalu nan di awak!"
Manjawab Jilatang Kampuang, "Manuruik pandapek hambo tantang ka Datu Banyak Barang alun masonyo kito pai. Banyak lai jalan nan lain untuak pahambek karajo nantun asa Tuan Bujang lai picayo adok ka badan diri hambo. Sabagai juo Tuan Bujang pihak di badan hambo nangko hilia mudiak patang jo pagi bia siang bialah malam bia ka mano Tuan suruah mancari apo nan paralu babuek apo nan kamungkin indak hambo manduo hati. Tantang karajo nan kini ko diamlah Tuan di nan tanang nak hambo cubo bausaho bak kato urang tuo-tuo,
"Pado tali dipatalikan,
eloklah talang dipakuek,
talang nan banyak kagunonyo:
pado kabaji dicarikan,
elok kacundang dipabuek,
kacundang bangai babakehnyo."
Mandanga rundiangan Aciak Cipeh-sanang rasonyo dalam hati badala raso kiro-kiro lalu manjawab inyo sakali,
69
