"Karambia di ujuang balai,
ditutuah batambah condong,
condongnyo madok ka hulu;
manusia kadok talalai,
dek lupo jadi tadorong,
dibao hawa jo napasu.
Kok tadorong inyo kadang-kadang tatampuah jalan nan baliku tapijak di banang basah pandai-pandai manjago diri:
Randam sabilah mato tombak,
dibasuah jo aia rumin,
dibao lalu ka muaro;
tanangkan lauik nan barombak,
kayuah pincalang nan mukumin,
labuahkan laia kiro-kiro.
Usah dibao masuak hati jan tingga mandamuik sajo bari nasihaik baiak-baiak rantangkan jalan panjang leba bayangkan jalan manurun tunjuakan jalan mandaki palihekan lurah jo bukik nyatokan padang jo kurinciang padata jalan bakeh suruik unjuakan contoh jo kiasan tapi jo dado lapang juo mambao sopan jo taratik manih muluik usah lupokan. Kok lah baitu dilakukan Insya Allah mudah-mudahan rukun damai lahia jo batin amanlah dalam rumah tanggo.
Sabagai pulo anak kanduang kok suami urang padagang atau suami urang parantau pandai-pandai manjago diri usah man- jadi rancah-camah kok barang apo kadituruik usah kadok bajalan surang bakawan juo anak kanduang labiah rancak jo Biai awak sakurang kurang jo urang tuo. Kok ado awak ka manjalang ataupun ado nan paralu usah panagak tangah jalan usah pangecek tapi labuah labiah-labiah jo urang mudo nan bukan karik kabiah awak pantangkan bagarah bakucindan bagio samo sadang awak,
Basasak jalan di lurah,
Pariaman banyak parigi;
bagarah pangka tingkarah,
kurang iman pasiaklah diri.
73
