apo mukasuik dalam hati,
sugiro malah katokan,
kok indak ado di awak,
ka urang kito batenggang.
Jokok di siang padi ladang,
padi ladang di tapi jalan;
kok indak dapek batenggang,
panjang jo singkek patampunkan.
Pihak dek Jilatang Kampuang-lalu disabuik nan di hati- bogo sakiro tanyo sajo. Sabab nan jadi pokok pangka-adolah niaik disangajo-bakato sambia baibaraik,
Urang maluruik padi ladang,
padi sianyak tambun jati,
tajelo di tangah sawah,
baolah ka pasamaian;
gadang mukasuik hambo datang,
niaik nak manyalang suri,
bangkalai lamo alun sudah,
nan punyo nanti-nantian.
Mandanga kato nan bak kian-manjawab Silaro Aceh, Kok itu nan ditanyokan-dangakan malah den katokan,
Padi disasak kok batangkai,
elok dijamua di tapi jalan,
antah kok lai salayannyo;
suri aluih nan tak bapakai,
indak ado denai manyimpan,
antah kok lai ditukangnyo.
Balahlah sariak di hulu,
dibalah lalu dilantakan;
sabalah Aciak dahulu,
mak den cubo mangandakan.
77
