jalan dialiah juo ka Biaro Piliang Gunuang ka Pamuncak Sutan Maka.
Tantang ka Canduang Koto Laweh ditajun manuruik Adaik diisi Adaik sapanuahnyo tando urang ka dibaliakan buruak batulak dangan ameh tasarah bakeh Datuak Bungsu jo Datuak Rajo Sakampuang manyalasaikan hetongan nantun iyo jo Datuak Rajo Api. Kok leh untuang pambari Allah indak ado sangkuik sampangnyo.
Lah patang candonyo hari alah bacarai urang nantun bajalan Datuak Rajo Sakampuang lah turun pulo Datuak Bungsu Ambuang Baro lah pai pulo tingga Aciak Silaro Aceh duduak surang sambia tamanuang.
Lorong kapado Aciak Cipeh-kalua dari pandapuran lalu bakato inyo sakali,
"Mano Kakak Silaro Aceh lah patang candonyo hari lah lamo bana hambo duduak lah habih siriah di carano bajalan hambo dahulu. Kok ado apo nan paralu nan jauah nan ka dijapuik Kakak pasankan malah hambo!"
Manjawab Silaro Aceh, "Kok iyo Adiak lah kapulang den lapeh malah dahulu. Kok lai bakaringanan datang baa bari suak pagi tolong juo denai batenggang mancukuikan apo nan kurang manyalang dalamak tuduang saji itu nan kurang pado kito. Tantu Adiak samo mandanga lah putuih mupakaik kami rundiangan nangko ka diasak ka Pamuncak Sutan Maka. Nan jadi putusan denaikarajo nangko indak ciek sakali marangkuah dayuang nak duo pulau talampau sarangkek sajo malangsuangkan jo si Buyuang Ambuang Baro iyo ka Koto Banda Tunggang. Denai nangko nak baguluik masak dibulan iko juo!"
Kununlah Aciak Jilatang Kampuang galak tasanyum bahandokan sabab lah lalu nan di hati karajo masak malah pulo lah pueh hati Tuan Bujang alah bakuak urang nantun lalu bakato inyo sanan,
"Mano Kakak Silaro Aceh kok lah baitu tapabuek lah
85
