↓Laman ko alah sah
Takajuik pulo malah inyo-takajuik babuek-buek iyolah Jilatang Kampuang-lalu bakato malah inyo-bak cando urang manyasa,
- "Mano Suri Balunan Suto-manyasa bana hambo kini-manga hambo sampai ka-mari kok lain kato-kato urang-disangko hambo jungkek patiang-tukang aṣuang tukang pitanah.Kok iyo baitu sangko urang-baa kalatak badan hambo. O, Suri Balunan Suto-sabuah hanyo pintak hambo-kok ado urang batanyo-kok lai urang manyiasek-lindungi malah hambo nangko!"
Manjawab Balunan Suto,
- "Mano Aciak urang nan datang-lorong badan diri Aciak-indak pulo hambo sasai-Aciak kan indak tahu pandai-tantang karajo kami nangko-Aciak kan urang disarayo-pasanang sajo malah hati!"
- Bakato Jilatang Kampuang, "Kini baitu hanyo lai-lapehlah hambo nak bajalan-jalan jauah kaditampuah-nak pulang hambo dahulu!"
- Manjawab Balunan Suto, "Kok lah baitu kato Aciak-dilapeh malah Aciak pulang. Bapasan hambo bakeh Aciak-kok lai tampak kakak hambo- Sutan Rajo Talauik Api-mintaklah.lakeh inyo pulang-katokan hambo mamasankan-ado bicaro nan tarumik!"
Dibao malah pasan nantun-dek Aciak Jilatang Kampuang-bajalan baguluik guluik-bak urang tagageh. Dek untuang kaparuntuangan-iyo basuo malah inyo-jo Rajo Talauik Api-lalu disampaikan malah pasan inyo taruih bajalan juo-bajalan ateh pamatang manuju nagari Balaigurah taruih ka rumah tampek diam. Lah sanang pulo dalam hati sabab lah sampai nan diniaik. Sarato tibo di rumahnyo taruih tidua inyo sakali sampai indak kalua-jua adolah garan tigo hari.
Pindah malah kaba nangko kapado diri Sutan Rajo-Sutan Rajo Talauik Api pasan sampai inyo pun pulang-ka rumah adiak kanduangnya.
88
