"Bagarah-garah koh garan Kakak-labuah golong tapian rami-nagari aman-santoso-dimalah urang kamanyamun-antah kok urang baolok-olok-atau rang gilo sasek lari-baa Kakak panakuik bana!"
Manjawab surang di antaronyo, "Manga itu ka dipagarahkan-kami bakato sabananyo. Kok Rangkayo indak picayo-cubopareso malah ka sanan-tapi jan surang Rangkayo pai-baolah kawan duo tigo-sabab urang 'ntun banyak bana-babaju hitam kasadonyo-bapisau tajam ciek surang. Ka kiun lalu kami cako-mukasuik nak mambali padi-iyo ka Canduang Koto Laweh
Tibo di Guguak Sikaruntuang-kalua inyo dari samak-diambeknyo kami kalalu-dihariak dubalangnyo. Dipabianyo ka-kami babaliak-balari baguluik-guluik-sumpik tingga ruang taicia-camehlah kami patah-patah-bana kumbali ka Rangkayo!"
Kunun rangkayo Ambuang Baro-lah badatak di dalam hati-bukanlah urang nak manyamun-tapi karajo disangajo-iyo karajo urang Canduang-nak mambuek gaduah di nagari. Naiak darahnyo sakutiko-badatak-datak garamannyo-tapi katonyo lunak juo,
"Manolah Kakak nan basamo-karano baitu nan tajadi-kok iyo dubalang rabuik-rampeh-mak hambo pai malihek-babaliak pulanglah Kakak dahulu!”
Lalu basegeh Ambuang Baro-bajalan baguluik-guluik-indaknyo mambao kawan-ditampuah jalan pamatang-hari badaro lapel luhua-dilalui sawah laweh-laweh-alah manurun maso itu- talampau kubu katanahan-sampai malah inyo di sanan iyo di Guguak Sikaruntuang--ditampek nan sunyi langang-di batang langgundi tinggi-dipimpiang nan lama-lamah-mancaliak inyo suok-kida-pancaliakan dipatamnyo
Indak nian diaso-aso-mahambua urang samak-tangah manatok tangah jalan-tangan di pinggang katigonyo-ruponyo urang bagak-bagak-suko mamakan masak-matah. Mamandang laku
nan bak kian-tatagun Gombang Ambuang Baro-disegehi juo malah badan-sambia mancari tampek tagak-lalu bakato inyo sakali,
95
