tibo kami di sanan, rakik lah dikarang pulo, rakik sudah kami balaia. Agak lah duo rantang panjang, lah tampan sasek palaiaran, rakik tadorong hanyuik kiun, ka aia mahantak batu, ka lubuak batu baraguang. Dalam sabanta nan baitu, lah tibo guru manolong, iolah Datuak Saiah Baradaik, sarato urang nan basamo.
"Kinilah sampai kami ka mari. Baitu asa jo mulonyo, agaklah sabab jo karano, maalun pulang pado datuak, kapado rapek nan basamo."
Manjawab kaampek suku,
"Bacindai Aluih nan Kuniang, rundiang nan sudah kami danga, kato nan datang dari kau, lah tarang ujuik mukasuiknyo, lah tantu asa jo mulonyo, dari awa sampai ka akia, dari ujuang lalu ka pangka. Lah tarang bamuko belah, lah nyato di rapek nan basamo, tadanga lah jaleh bana, lah sanang pulo hati kami."
Dalam sasaaik sakutiko, nan sabanta itu juo, bakato si Rajo Ameh,
"Mano Datuak Saiah Baradaik, sarato Datuak kaampek suku, andiko dalam nagari, nan duduak jo adaik jo pusako, nan tagak jo barih jo balabeh, nan tahu dicupak gantang, nan biang buliah manabuak, nan gantiang buliah mamutuih, di dalam balai balairung nangko. Sawajah kami nan baduo, nak jan barulang buruak pulo, jan sansai dibao untuang, niaik mukasuik dalam hati, O, Datuak sampaikan niaik kami, minta kawin kami di siko. Dangan baribu pangharapan, tolong dek Datuak badan kami."
Manjawab Datuak Saiah Baradaik,
"Mano Buyuang janyo hambo, banamo si Rajo Ameh. Sapanjang kato ang itu, alah saluruih satujuan, nyato saalua satantangan; tapi sungguahpun baitu, sungguah pahek lah dibarih, samatang kato lah dialua, dek papatah bida kito, nan tidak lapuak dek hujan, nan tidak lakang dek paneh, tiok bakato jo mupakaik, musyawaraik kami dahulu, mananti ang sakutiko."
Bakato pulo Datuak Saiah Baradaik,
"Mano Datuak kaampek suku, sarato rapek nan basamo!
91
