Sapanjang kato nan didanga, nan datang dari Rajo Ameh, alahkoh kawi janyo adaik, alahkoh luruih janyo patuik, cubolah timbang dahulu."
Lambek sabanta antaronyo, bakato kaampek suku,
"Mano Datuak Saiah Baradaik, kami nan sudah samupakaik. Sapanjang kato Datuak tadi, pintak jo pinto Rajo Ameh, lah patuik kito mukabuakan. Sabab baa dek baitu, karano kito dalam adaik di Alam Minangkabau, saanak sakamanakan. Kok buruak samo dibuang, kok maro samo ditulak, elok nan samo dipunjuang. Inyo supayo jan mularaik, patuik dilakukan kandak inyo. Tapi sungguahpun baitu, pihak di kami nan basamo, sakaji Datuak nan ampek suku, sarato andiko di nagari, mangumbalikan pado Datuak."
Manjawah Datuak Saiah Baradaik,
"Pihak di badan diri hambo, malah sasuai samupakaik, sakato rapek nan basamo, hambo nan utang manarimo." Lah bakato sarupo tu, mahadoknyo ka Rajo Ameh, baduo jo Bacindai Aluih, lalu bakato nyo sakali,
"O Buyuang si Rajo Ameh, sarato Bacindai Aluih, sapanjang niaik naja waang, sarato Bacindai Aluih, rapeklah sudah manimbang, pintak lah sudah balaku. Tapi sungguahpun baitu, manuruik adaik nan biaso, io di dalam nagari ko, kok tumbuah kawin mangawin, kok ado sarak jo carai, atau rujuak pun sakali, etan disurau nan gadang, di muko Tuanku Alim Tahu, Buyuang ka kian kito pai."
Mahadok pula ka karapatan,
"Mano Datuak kaampek suku, sarato rapek nan basamo. Rundiang nan sudah dibincangkan, saketek tidak nan taumun, hanyolah kimus kasamonyo, rapek ditutuik hanyo lai."
X. KAWIN
Urang lahi unai kasamonyo, lah tagak Datuak Saiah Baradaik.
92
