Hari lah badarok patang, baliau bajalan pulang, etan ka kampuang nan gadang. Agaklah si Rajo Ameh, sarato Bacindai Aluih,tigo jo Ranggo Inai, ampek jo Puti Bungo Pandan, limo jo Puti Bungo Kapeh, inyo lah manuruik sajo, mairiangkan Datuak Saiah Baradaik. Lah sarantang pajalanan, agaklah duo rantang panjang, lah tibo baliau di rumah, lalu naiak sakali. Nan samalam-malam nantun, sudah minun sudah makan, urang banyak di nagari, nan tidak pai ka balai, nan balun basuo jo Bacindai, lah datang batoboh-toboh, lah tibo bauruang-uruang, rumah nan luak-luak panuah. Tanyo-batanyo rang nan datang, kapado Bacindai Aluih, rundiang nan banyak kali ulang, kato lah kadok nan tasabuik, lah banyak kato babaluak lah ragu Bacindai Aluih. Hari lah lerek tangah malam, urang lah pulang ka rumahnyo, bakato Datuak Saiah Baradaik,
"O Buyuang si Rajo Ameh, laloklah kito dahulu; Bacindai Aluih nan Kuniang. tidualah kau ka kiun, ka dalam biliak nan gadang."
Alah sabanta duo banta, agak takalok kasamonyo, badan di- jawek-jawek lapiak, sampai barisuak pagi hari. Murai bakicau hari siang, lah bangun duduak ka samonyo, lah pai mambasuah muko, etan ka tapian nan babanja, agak ka sawah nan bajanjang. Lah sudah Bacindai mandi, agak jo puti nan batigo, salalu pulang sakali. Lah tibo di ateh rumah, bajalan ka padapuaran, nasi masak kawa lah masak. Kunun dek Puti Amin Suri, andeh kanduang si Ranggo Inai, disanduak nasi sakali, kawa dicucuakan pulo, dibao ka tangah rumah, ka muko Datuak Saiah Baradaik, sarato si Rajo Ameh. Hidangan sudah sadio, lah samo minun jo makan. Lambek sabanta antaronyo, minun pueh makan lah kanyang, agaklah sudah kasamonyo. Digiliang rokok sabatang, io dek siRajo Amch; siriah lah dikapua pulo, io dek Bacindai Aluih, sarato jo puti nan batigo. Sadang pareso jolong dapek, bakato DatuakSaiah Baradaik,
"O Buyuang si Rajo Ameh, sarato Bacindai Aluih! Buyuang malah kito pai, kapado Tuanku Alim Tahu, etan ka surau nan gadang."
93
