Manjawab Tuanku Alim Tahu,
"Sapanjang pintak pinto Datuak, hambo nan utang mamba- nakan; aluaran sidakah nan taunjuak, lah hambo tarimo pulo."
Lah tagak Datuak Saiah Baradaik, sarato si Rajo Ameh, agak jo Bacindai Aluih, lah samo bamaoh-maoh, salalu turun sakali, lah mudiak labuah nan panjang, jo Datuak Saiah Baradaik. Agaklah si Rajo Ameh, duo jo Bacindai Aluih, inyo lah riang-riang bedo, lah samo bahati gadang. Bakato Datuak Saiah Baradaik, andai papatah dirundiangkan,
"O Buyuang si Rajo Ameh, duo jo Bacindai Aluih, dangakan malah dek ang,
Ditariak daun gumbelu,
dibao ka tapi pulau,
diracik jo ujuang sakin,
kajadi tawa dililiakan.
Puntiang lah tibo dahulu,
takanak pati ambalau,
katangga indak kamungkin,
antah kok Allah manggarakkan."
Lah sarantang pajalanan, agaklah duo rantang panjang, lah tibo di kampuang nan gadang, di rumah Datuak Saiah Baradaik, salalu naiak sakali. Sarato tibo di ateh rumah, usua tibo pareso datang, agak dek puti nan batigo, kapado Bacindai Aluih. Rundiang nan balun bajawab, garah kucikak nan lah banyak, gurau kucindan nan lah labiah, tak dapek rundiang nan bana, tak buliah kato nan sungguah, agak dek Bacindai Aluih. Bakato Datuak Saiah Baradaik,
"Manolah anak kanduang hambo, banamo si Ranggo Inai! Sapanjang niaik naja inyo, agak jo si Rajo Ameh, duo jo Bacindai Aluih, pintak buliah kandak balaku, niaik sampai kaua salamaik, lah kawin sabanta iko, di surau Tuanku Alim Tahu."
Manjawab Puti Ranggo Inai,
95
