takana dikorong kampuang, taragak diadiak kanduang, kato sapatah nan dimintak, barilah izin badan kami."
Manjawab Datuak Saiah Baradaik,
"Sapanjang pintak pinto ang, pihak di kami nan basamo, nan tidak dapek diilakkan, sabab kato sasungguahnyo, lah suko kami malapeh. Sabab baa dek baitu, tumbuah diurang bak di awak, pihak di ibu bapak ang, salamo ang bacarai, hilang bak batu dibanam, bak hanyuik ka hilia aia, bak luluih ka tanah lakang, nan tidak dapek baritonyo. Dek sayang andeh ka anak, tiok rundiang tasabuik juo, tiok bakato nak manangih, sarupo agaknyo jo ang.
Bakato Tan Rajo Ameh,
Manolah Datuak guru hambo, sarato andeh nan basamo! Salamo kami di siko, aia satitiak dari bapak, nan sakapa dari Mandeh, nyato manjadi darah dagiang. Pihak di badan diri hambo, sarato Bacindai Aluih, handai kucindan nan tak putuih, garah kucikak balampauan. Kok ado.kilaf jo gilafat, kato sapatah kok tadorong, muluik kok ado nan talompek; salain pulo dari itu, kok ado utang piutang, utang paham utang atikaik, utang kato utang kurenah, atau utang kain baju, atau utang ameh perak, baiak pitih pun sakali; kok ado ciek jo duo, mintak dirilakan kasamonyo, nak jan manyeso pado dunia, nak jan mambarek ka akiraik, nak jan sampai tabao mati. Malah barisuak pagi hari, kito ka bacarai-carai, diri batulak balakang; bukan bacarai rago mandi, bukan bak hilang salamo iko, carai ka balamo-lamo, antah pun babilang musin. Sagalo rundiang nan tasabuik, pihak di kami nan baduo, dimintak maoh gadang-gadang dimintak ampun banyak-banyak."
Manjawab Datuak Saiah Baradaik, sarato Puti Amin Suri,
"Sapanjang kato ang tu, pihak di badan diri kami, kalau tasuo nan baitu, sapanjang agak-agak ang, nak santoso awa akia, salasai dunia akiraik, lah suko kami marilakan. Tapi sungguahpun baitu, ado pulo nan takana, rundiang tahadok bakeh ang, sarato jo Bacindai Aluih. Sawajah badan diri kami, kok ado pulo nan tadorong, piie kurenah nan tasalah, kato nan tidak sapatuiknyo, kok tak dimuluik dalam hati, atau tak lahia dalam batin, maohkan pulo dek ang, sarato Bacindai Aluih."Templat:Right
