I. KAWAJIBAN IBU BAPO
Awa kalam mulonyo kato, ampun jo maoh ditulihkan. Kok sasek kalam babarito, dimintak pambaco mambatuakan.
Tatakalo maso dahulunyo, samusin maso saisuak, di dalam ranah Tanjuang Pati, di ulak rimbu Sijantiak, di Bendang rawang di tangah, di Mandailiang nan di tapi, adolah sorang parampuan, banamo Bacindai Aluih. Bapaknyo Intan Diawan, Intan Diawan nan Bagonjong: mandehnyo Kayo Bandiangan; mamaknyo Rajo Mahudun, andiko dalam adaik, suluah Bendang kaampek suku, camin taruih dalam nagari, naraco bungka nan piawai, baniah satangkai tak nan ampo, di sanan duduak mahukun.
Anak nan sajak mulo kaciak, tinggi dek baanjuang-anjuang, gadang dek baamba-amba; dek paluak ibu jo bapo, dek timang niniak jo mamak, lah gadang. Bacindai Aluih, lah gadih jolong malipeh; awak nan langkak langkai bedo, elok kacak gamaknyo sadang, tumiknyo manalua burung, muko nan bagai bulan panuah, daguak bak awan tagantuang, bibianyo limau sauleh, hiduang talu-tuak dipancuang, bulu mato samuik baririang, talingo jarek tata-han, pipi pauah dilayang, kaniangnyo kaliaran taji, rambuik nan tidak panjang bana, manyapu tumik kakinyo.
Adolah kapado suatu maso, nan sasaaik sakutiko, di ateh rumah nan gadang, kutiko sudah minum makan, bakato sanan bapaknyo, iolah Intan Diawan, sarato mandeh kanduangnyo, banamo Kayo Bandiangan,
“Mano anak Bacindai Aluih, anak ka man malah duduak, kau nan sajak mulo ketek, balun batunjuak baajari; dangakan banalah dek kau, nak hambo curai papakan. Ingek-ingek kau manyimak, latak di dalam kiro-kiro, taruahkan bana dalam hati. Kok tumbuah aiek jo jamu, di dalam koto jo nagari, atau di dusun
15
