harok-harok cameh, nan bak baladang tapi aia, harok bak raso kalai, cameh bak raso katidak. Laikoh buliah pintak kito; laikoh ado nan dijalang?”
Manjawab si Kayo Oto,
”O Tuan Tan Rajo Ameh, sapanjang nioik jo mukasuik, lai tauriah dikubik, tatakok dinan io, pintak buliah kandak balaku. Tapi sungguahpun baitu, Tuan disuruahnyo datang, inyo mananti di situ.”
Tadanga dikato itu, bajalan si Rajo Ameh, ka rumah Pakiah Muhamaik. Lah tibo pulo di sanan, Jah duduak barundiang-rundiang, bakato Pakiah Muhamaik, kapado si Rajo Ameh,
”Si Kayo Oto ka mari tadi inyo nak manyalang balam, sarato jarek nan sarawan, tuannya handak bapikek lo lai bana kato inyo, io baitu rundiangan Waang?”
Manjawab si Rajo Ameh,
”Sagalo rundiang nan disabuikkan, pihak dek si Kayo Oto, kapado diri Tuan Pakiah, itulah kato sasungguhnya.”
Manjawab Pakiah Muhamaik,
”O Bujuang si Rajo Ameh, ka mano ang kabapikek, di malah balam nan turun?”
Manjawab si Rajo Ameh,
"Kok itu Tuan tanyokan, etan di Mungo Andaieh, agak ka Padang Tiaka. Panggialah batimpo-timpo, pasan lah barulang-ulang: tasabuik urang nan babalam, bulek kakiun balako, hambo sorang nan tidak pai.”
Manjawab Pakiah Muhamaik,
”Kok anyo tantang di sanan, agak di Padang Tiaka, Bujuang usah ang cinto, jan lai ang pai ka kiun. Sabab baa dek baitu, balam banyak nan tak elok bunyinyo buak-buakan, mahangguak manggayo tidak, bapantang mau satahun. O Buyuang si Rajo Ameh, kok io takana nak bapikek, Buyuang kiun kito pai, etan ka rimbo Sijantiak, ka tanjuang tigo pinjuru. Balam dihimbaukan
23
