suak hari siang. Hambo nan dapek kaba angin, galanggang tigo nan rami, di Situjuah Banda Dalam, galanggang Datuak Malagiri; duo jo Gaduik Tabiang Tinggi, galanggang Patiah Mahudun; katigo galanggang Datuak Bandaro, di Pakan Akaik Sumulanggang, di kanan cubadak hampo. Tuan piliahlah dek Tuan, ka mano kito ka pai."
Manjawab si Rajo Ameh,
"Kalau baitu janyo kau, batanyo hambo pado Adiak. Di dalam galanggang nan tigo tu, di mano urang nan rami, di mano juaro nan tasabuik."
Manjawab Bacindai Aluih,
"Kok itu Tuan tanyokan, hambo mandanga-danga kaba, sampai tabatiak tabarito, tabincang hilia jo mudiak, tadanga kiri jo kanan, rami galanggang Datuak Bandoro. Janang juaro nan di sanan, pandai mangati samo barek, lai mambidai samo laweh, kok maukua samo panjang, tahu di angin turun naiak, tak buliah bapihak-pihak, samo suko timba baliak, baitu tando pandainyo.
Tadanga dikato itu, manjawab si Rajo Ameh,
"Malah baitu janyo kau, elok ka kiun kito pai, ka Pakan Akaik Sumulanggang. Dibuek janji dangan padam, etan di kubang nan sakaki, agak diaua nan sarumpun, di labuah basimpang ampek, di sanan hambo nananti; kiro-kiro sapangga matoari naiak, adiak sugiro kau datang."
Manjawab Bacindai Aluih,
"Malah baitu janyo Tuan, hambo nan utang mambanakan. Tapi samantang pun baitu, kok lamo lambek saketek, kok talalai dek bakameh, usah Tuan dahulu sajo, nantikan hambo sampai datang."
Manjawab si Rajo Ameh,
"Sapanjang kato kau itu, malah alemu kito kanduang, samo
baama malah kito. Mano Adiak Bacindai Aluih, pihak dirundiang kito kini, alah sakabek samo harek,alah sabuhua samo mati, tidak batuka jo batimbang, tidak basimpang jo basapiah, satu pun tidak banan hampo, hanyolah boneh satangkainyo. Hambo
34
