"Hilalang di sawah banto,
disabik urang kok bangih.
Kalau lah hilang dari mato,
dagang baurai buah tangih."
Manjawab Bacindai Aluih, "O Tuan Tan Rajo Ameh, dangakan juo dek Tuan,
Mudiak ka koto Pariangan,
nak singgah ka Suruaso.
Sayang kok lapeh dari tangan,
dunia akiraik badan binaso."
Manjawab pulo Rajo Ameh,
"Dirantang tali lah putuih,
diuleh basamo-samo.
Kasiah Adiak janganlah putuih,
diharok balamo-lamo."
Manjawab Bacindai Aluih,
"O Tuan Tan Rajo Ameh, rundiang nan tidak kunjuang sudah, hari batambah patang juo, Tuan kapai jo rundiangan, hambo ka tingga di siko, mupakaik nan sudah dipabuek, janji nan usah di mungkiri."
Manjawab si Rajo Ameh, bakato sambia ka bawah,
"Pihak di badan diri hambo, baguluang bumi jo langik, tagendeng nagari Makah, janji nan sudah kito karang, haram kok lapeh diganggaman."
Sudah bakato nan bak kian, bajalan si Rajo Ameh, manampuah ranah sawah bandang.
IV. DALAM MEDAN PANYABUANGAN
Lah sarantang pajalanan, lah duo rantang panjang, cukuik
katigo raso sampai, tibo dipasumayan banyak. Lah tampak si
36
