Lah naiak si Rajo Ameh, lah duduak barundiang-rundiang, nasi tibo kopi lah datang, bakato Marajo Ulak Sumano,
"Minun makan kito dahulu!"
Manjawab si Rajo Ameh,
"Dek hambo manjalang ka mari, baru sudah minun makan, sadang kanyang baru kini. O Tuan makanlah dulu!"
Lah sudah minun jo makan, io Marajo Ulak Sumano, bakato si Rajo Ameh,
"Sabab hambo datang ka mari, gadang mukasuik dalam hati, nak barundiang samo sorang, kecek ko ado banan batin, bapaserek kito ka bawah."
Manjawab Marajo Ulak Sumano,
"Malah baitu janyo Tuan, hambo nan utang manuruikkan." Salalu turun sakali, lah masuak ka bawah lumbuang, di sanan duduak barundiang. Bakato si Rajo Ameh,
"Hari nan sahari kapatang, pihak di diri badan hambo, lah digilo hawa napasu, lah dimabuak paratian; dek mujua tak dapek diraiah, malang tak buliah ditulak, lah pai kami bapikek, jo Tuan Pakiah Muhamaik, etan ka Tanjuang Langundi. Takajuik balam tambago, lapeh dek jari nan sapuluah, tabang ka pangguang padi ladang. Bacindai sadang manggaro, babuni inyo di sanan, lalu dicakaunyo sakali, masuak ka dalam sangka bulek, rintang mahangguak jo manggayo. Lah sabanta antaronyo, lah tibo hambo di sanan, batanyo hambo sakali, kapado Bacindai Aluih. Asiang tanyo lain jawabnyo, garah jo gurau nan tak putuih, kucindan banyak balampauan, baitu sabab karanonyo, bamulo si patuang ka hanyuik. Dek lamo duduak mangecek, habih gali dek bagisia, lah dapek misa dek biaso, bukak mambukak parasoan, rundiang marundiang cinto hati, sajak di awa kaakianyo. Sapakaik rundiang damikian, sampai dilabuahkan janji, sudah dikarangkan buek; hari barisuak pagi hari, kapai ka galanggang sabuang, di pakan Akaik Sumulanggang di sanan balai nan rami. Tuan pai kito kakiun, ayam nan duo sapauiktan, sikua kulabu pipik pinang, sikua jalak balah rotan; Tuan, nan mano kito bao?”
38
