Tabang anak kumbang janti,
hinggok di rumpun sikaduduak.
Tibo ka marilah baranti,
tampaik nan linduang kito duduak.”
Manjawab Bacindai Aluih, dangakan pulolah dek Tuan
"Singgah ka parak ampalu,
ladang nak urang Suruaso.
Bakipeh palak awak dahulu,
latiah nan tidak bakuaso."
Bakato pulo si Rajo Ameh,
"Lah payah hambo dek maani,
banang satuka jadi limo,
limo manjadi anam baleh,
nan tidak panjang-panjangnyo,
kok suto hambo turuiki.
Lah payah hambo dek mananti,
baluka jadi rimbo,
rimbo manjadi gurun tandeh,
nan tidak datang-datangnyo,
bak raso ka hambo turuiki."
Tadanga dikato itu, manjawab Bacindai Aluih,
"Dangakan malah dek Tuan, pantun ibaraik kato hambo,
Hari dek tidak kunjuang patang.
matoari tak kunjuang pantai,
ditariak cincin jo galang,
pakaian anak rang Kinari,
Lai dek tidak kunjuang datang.
bajalan dek lambek sampai,
banyak maro nan mahalang,
dek mujua sampai ka mari.
Bakato si Rajo Ameh,
41
